引擎
【文、圖／徐佳妤／臺北市客語支援教師】
發音人：徐佳妤（南四縣腔）
噗~噗~噗~，咻！引擎騎出去，細隻倈仔阿成去外送哩喲。
舊年，佢還毋曾考上大學，就先同崖討愛買一臺引擎，崖應承了，同佢講愛等大學考試結束後正買哦。佢自家先通過筆試，又摎同學借車仔，有時就用租个，一到放尞日就蓋煞猛去尋位所練習，毋知係同學教佢還係自家學个，無報名駕訓班，就學會騎車仔咧。路考前禮拜，佢講：「媽媽，崖愛考引擎駕照，做得分崖報名費無？」「你學會咧？」「嗯。」心肚想：這細人仔，拗蠻壁！就恁仔，佢一個人去監理所，一擺就通過路考，該日拿著駕照，崖比佢還過歡喜。
對考上大學該日起勢，佢去到哪，引擎就騎到哪，大學開學該日，阿成對屋下一路騎到中壢，「倈仔，你毋會撞走哦？」「仰會？有手機仔導航帶路啊！」崖一聽著，越至佩服佢。有一日放尞，看著佢帶轉一隻青色四角形个大箱仔，箱仔頂項寫等：Ubereats，「倈仔，你去做外送人員哦？」「係啊！時間較彈性又自由。」「哦，毋好騎恁遽，愛細義哦。」因為佢大學讀財經法律系，堵好吾个外甥女係法官，厥老公又係律師，本成想問佢兩公婆，律師事務所需要暑期工讀生無，喚倈仔去做，無想著，倈仔嗄講：「崖毋想坐辦公室啦！」就自家尋了外送个事頭。
這個倈仔，從細到大，都有自家个想法，做阿姆儕無法度改變佢，只好淨在後背恬恬支持佢決定做个每一件事情。有一句話講：「天生天養，會跌會大」阿成，就係一個盡少分崖愁慮个細人仔。九月二十四號，崖確診了，圓身蓋毋爽快，毋想煮食，大隻个倈仔阿洋講：「喊外送好無？」就恁仔，在發病畀隔離這段時間，這新興个產業，大家用外送个機會緊來緊多，正經感謝每一個外送人員。
每擺，崖看著這兜辛苦送過來个餐點，就像係阿成送分崖食共樣，一餐飯，毋單淨係一餐飯，係一餐燒暖、直直透到心肚个幸福美食。
※本文的「崖」同教育部訂的「𠊎」之意。
