富岡故事館──你的香气
【文、圖／薛常威／國立中央大學客家語文暨社會科學學系在職專班碩士】
發音人：薛常威（海陸腔）
在2022年富岡鐵道藝術節以後，在富岡這恬靜，超過9成係客人个細地方，乜有了一間故事館，「富岡故事館」摎其他个故事館無共樣，這位毋係講名人个故事也毋係講重大个歷史事件。「富岡故事館」較多係講一般人，細人物个故事。還過這故事館無公部門支持，完全係在地人自家舞起來个。
「富岡故事館」在富岡火車頭出來行無幾步斯到了，本來係農會有70年歷史个放肥料个倉庫，一群在地人拿來重新整理活化，正開始有這間故事館，主要展出係富岡个歷史，還過細人物个故事。展出个主題安到「鬧熱富岡」，用一年四季个方式來講富岡故事，像大井頭，萬善爺廟，中元㓾大豬、輕便車、㧡米工、後街个故事，全部當生趣。故事館乜係當好个表演空間，做得辦講座、看電影、辦課程、也係當地弱勢家庭聚會个所在。希望做得分這恬靜个富岡變較鬧熱。
在故事館裡背還有一間「你的香气」咖啡店，「气」其實係一隻古字，店名係來自約書亞樂團个一條歌「你的香氣」。店主人兩公婆係當誠心个基督徒，乜當好煮咖啡，一擺當好个緣分，佢兜來這開這一間咖啡店，逐隻拜六，禮拜下晝開店，除忒咖啡，還有當好食个甜點，客家飯篼仔摎客家點心。還買得到當有特色个故事咖啡轉去自家泡來啉。
頭家娘毋單淨手藝好，佢本身乜係一個畫家，教大人細子畫圖有十過年个歷史，在教會佢乜有陪特殊个細人讀書个經驗。在故事館裡背就長透舉辦畫圖个活動。希望「你的香气」這間咖啡店个加入，做得分這單純恬靜个富岡，帶來還較多个溫暖摎愛。
