中壢忠義祠探源（上）
【文、圖／徐貴榮／國立中央大學客家語文暨社會科學學系兼任助理教授】
發音人：徐貴榮（四縣腔）
位在中壢火車頭西南片無幾遠个龍岡路、中北路口，有一細細間仔个「忠義祠」（圖1），民間都喊佢「大墓公」，到底係麼个來源呢？怕無幾多儕知。
圖1 中壢忠義祠現貌（2018.07.05攝）
民國84年，筆者受邀編寫「中壢市志」藝術篇，前清舉人余春錦个後人-中壢農校退休个余榮宗校長來尋𠊎，講中壢有一間埋葬「河南兵」个「大墓公」，定著愛同佢寫落去，又帶筆者去看這間廟，正知這間廟个位所。筆者雖然毋係寫這方面个專題，毋過嗄引起筆者當大个興趣，想愛去探討。
看廟脣壁項民國65年起廟刻个「忠義祠重建序」，寫等「本祠建於民前十四年（光緒二十四年），原曰大墓公，忠義公係清台巡撫唐景崧部屬河南邦…土地由湯阿秀捐獻…」來看，確實原來安到「大墓公」，埋葬个係「河南兵」。看神牌係風水个碑石，左片頂高刻等「光緒三十一年戊戌年秋月立」，中央大字刻「義塚諸君之墓」，左右兩片各刻細字「萬善諸公神位」、「大墓公之神位」（圖2）。講係「祠」，還係一座「風水」呀！大墓公並毋係主神，試着有當多个疑狐。問着地主姓湯个後人，怕係毋熟事，一問三不知，毋肯接受訪問。
圖2 民國65（1976）年重建个「忠義祠」神位（約1998攝）
後來看着民間歷史學者黃榮洛先生个考究，認為這「河南邦」（河南兵）毋係河南人，也毋係湖南人、荷蘭人，係廣東珠江三角洲「河南營」个「粵勇」。光緒21（1895 ）年「台灣民主國」成立無幾日，唐景崧總統就瀉走咧！這兜「河南兵」想愛轉大陸，背等銃仔，繫等錢銀，「慶慶況況」順等縱貫鐵路行等下。來到中壢、平鎮合界這搭仔，吂知嗄嚇着牛群亂飆，莊民看着佢兜帶等恁多錢銀，就同佢兜逐到中壢後站个一隻陂塘肚，全部㓾死，搶走錢銀，發生得人驚个「河南兵事件」。該係恁仔，「河南兵」並無戰功，仰會安到「義塚」呢？
後來經過多擺个打探，正尋着當時起廟總幹事劉坡榮先生。劉先生分筆者看當多重建以前个「大墓公」相片（圖3），詳細講起改建个經過。包括河南兵故事、改建因由、經過、檢骨情形、參加人員、安名原因這兜。大體就係講「大墓公無骨骸，河南兵骨頭當多當大支，分三窟，還有萬善公，有兜浸水，各窟做記號，總下拈起用四十零隻大麻布袋裝。到祠做好，骨頭曬躁，再放火炭照原但記號，原窟進金落去，過將伯公仔（福神）徙落祠肚共下服祀。想着河南兵係軍人，衰過客死他鄉，讓佢兜都安息，還係用原但个碑石鑲上去，原但碑石寫等『義塚諸君』，故所決議安名『忠義祠』。祠外一對鎮祠『貊犬』，係39年起拜亭該兩時，從廢忒个中壢神社，人無愛拈來个（圖1）。」筆者訪談幾下擺劉先生過後，再過收集資料，寫成一篇「中壢忠義祠 奉祀異鄉魂」个文章，在90（2001）年3月26日刊到聯合報鄉情版。
圖3 劉坡榮先生提供「大墓公」原貌相片，民國39年起拜亭過後，碑石正有陰
（徐貴榮2000年翻拍）
（本文還吂寫完，下篇待續）
※本文的「着」，同教育部訂的「著」之意。
