後生毋看水滸 老人毋看三國
【圖／廖千慧；文／何石松】
發音人：何石松（海陸腔）
後生毋看水滸 老人毋看三國，係講後生時節毋好看《水滸傳》，老咧毋好看《三國演義》等小說。奇怪，共樣係分金聖嘆評為「六大才子書」之一，李漁安腦為「四大奇書」之一介《水滸傳》摎《三國演義》，前者又係最早介白話長篇小說，後者也係在民間流傳最闊介章回小說，仰般一本後生人毋好看？一本老人家毋好看，實在有奇故。
不管哪種小說，客家人全部摎佢安做「傳仔」。可能有儘多朋友，還記得細細時節，做毋得看傳仔介經驗，還可能有囥在眠床裡肚偷看，分屋下人責備介回憶，認為該係荒功廢業，係一種「石牯種竹無正根，看你毋係正經人」介邪道，會害著自家，講也講毋清楚，看著爺哀該緊張介表情，可能後背有毋敢講出嘴介歷史原因。
做毋得看傳仔，毋單淨吾俚定定。在《紅樓夢》裡肚介賈寶玉，也在外背覓兜傳仔轉來，在眠床肚偷看，因為看到昶入文，在言語之間，還得罪著林黛玉，閼捽捽介講愛去投厥舅，所以，頭擺後生人偷看傳仔係當緊張介。該仰般講後生人毋好看《水滸傳》呢？
就係因為明朝崇禎年間，各地都有反政府介起義行動，恁堵好，該下，有一個當好看《水滸傳》介後生人李青山，照這本書介樣仔，學習造反介行動，希望朝廷招安，好來做官。當時介刑科官員左懋第，就上表講這兜人反政府介行狀，係一種造反，係受著《水滸傳》介影響，所以，《水滸傳》係一本賊書，強盜書，會教壞人，做毋得看，也做毋得壙有這本書，有這本書介人，全部有罪。果然，皇帝就下令將這本書列為禁書，該隻後生人，毋單淨官無做著，嗄分佢判死刑。無想著，斯恁樣，影響著後來四百零年，百姓無幾多人敢看介命運。到了乾隆年間，又再度下令為禁書，做毋得看，尤其係後生人，更做毋得看，驚佢造反。
《水滸傳》，係宋江帶等血氣方剛介108條好漢，在梁山嘯眾聚義，替天行道介故事。不管做幾多好事，官廳還係認為佢兜係山賊，有罪介，後生人昶直，受著影響，就會葬送大好前途摎性命，惜子介爺哀，仰般肯這兜毋知頭天介後生人看《水滸傳》，毋堵好就會去送死？加上乾隆年間，出一本書，安到《薛剛反唐》，係講薛剛性格當強，在正月半看花燈時節，看毋慣官員欺負善良百姓，替人出頭，嗄昶過魯夫，打死太子、官員，害著歸隻家族300零儕分佢連累，全部抄家滅族，冤枉來死。後生人仰般做得看這兜動啊著就㓾人放火介書，害大家無命呢？所以講：後生人毋好看水滸傳。
該老人仰又毋好看三國？大家都知，理想介社會，係愛分老人家安享天年，血氣衰弱介老人，愛過一隻安詳恬靜介生活，實在毋堪再來過該用盡心機，「對面手牽手，後背下毒手」，謀略智巧介生活，偏偏三國裡背，多介就係這兜計謀，像王允介美人計，連環計，曹操介借刀殺人計，周瑜介苦肉計，諸葛亮介空城計等等，無一隻毋係費盡心機，愛收人老命介，無牙無齒介老人家，還看這恁多計謀，實在毋適當。
又看著該諸葛亮一生謹慎，還係出師未捷身先死，關公介過五關斬六將，千軍萬馬，噦喤煞天介相㓾，血流血戳，兵荒馬亂，阿姆蹬腳噭，阿爸捶心肝，人民流離失所介場面，半夜想起，發夢也會著驚，老人家又何必看這兜書，變到無落無著，無安無樂，愁勞博激呢？
其實，後生毋看水滸，老咧毋看三國，係表面介意思定定，深一層來講，這係互文介修辭。正經意思係：後生人毋好看水滸，也毋好看三國；老人家毋好看水滸，也毋好看三國，全部都做毋得看，這兜，全部係傳仔，做毋得看傳仔。客家人驚心到這下，實在係：「生年不滿百，常懷千歲憂」啊！
不過，話講轉來，毋係做得，做毋得介問題，係愛用正確介態度來看。所謂「入門愛正，立志愛高」，用孔孟之道存心，仁愛之心為本，可以從心所欲，不離規矩。有人講，愛用「出」字看水滸，毋好認為佢兜做介全係著介；用「入」字看三國，深入了解忠奸，善惡，道術，義利之分，不論後生人，抑係老人家，就毋會「一失足成千古恨，再回頭已百年身」介艱苦，可以放心去「後生看水滸，老人看三國」啊！
※本文的「介」為大眾通用的「的」，同教育部訂的「个」之意。
