臺灣盡靚个風景
【文、圖／溫育華／草漯國小科任老師】
發音人：溫育華（海陸腔）
若係有外國人問臺灣盡靚个風景在哪？係阿里山个日出、抑係野柳地質公園、抑係臺北101大樓？論真講，這兜全係臺灣有名个風景，毋過對𠊎來講，臺灣盡靚个風景，毋係有名个觀光所在，係「人情味」。
記得舊年時節，阿爸个美國同事來臺灣自助旅行，佢兜行到苗栗獅頭山，摎旁脣个人家借便所，主人一看係外國人，毋單淨借便所，還盡熱心招待遠方來个朋友。主人知佢兜係利用自助旅行个方式認識臺灣，就扌帣手紹介臺灣有名个觀光地方，還煮一餐豐沛个客家美食請外國人食。月底，阿爸个同事愛坐飛機轉美國，在飛機場摎阿爸講：「這擺來臺灣十過日，分𠊎兜感受著臺灣个風景盡靚，連人心乜靚。」還摎阿爸約定，下二擺愛帶屋下人來臺灣好好遶尞。臺灣有淰淰个人情味，不管熟事抑毋認識，「見面總有三分情。」
有一個七十歲个阿婆，透長年在銀行做義工，阿婆平常時盡有禮貌，對人當客氣，成時還會帶自家做个𧊅絲梅、柿餅、牛眼乾分大家做點心。逐隻月還會用銀行个簿仔，領三千箍做所費，這係厥倈仔在日本做事分佢个錢。過忒幾隻月，佢倈仔過身，這隻月阿婆照樣去銀行領錢，銀行个工作人員阿蘭摎阿婆講：「你个簿仔肚無半銑錢，做毋得領錢咧！」，阿婆一聽啊著就火燒屎朏拚拚滾大聲噭罵：「這係𠊎倈仔死以前留分𠊎个財產，全囥在簿肚。」講忒又開始大聲噭無停，阿蘭心肝肚愐想：「今晡日，阿婆係食著炸彈係無？火氣恁大，烳鑼講到缽還係講毋會分醒，抑係單丁子過身，打擊著！」警察摎阿婆載去派出所。最尾警察倒轉來，拿三千箍分銀行經理講：「稍早係阿婆有來領錢，你就分佢領。」逐隻月𠊎會拿三千箍放在銀行。
過無幾久，這個警察愛調去別隻單位，就摎局長講：「下隻月，𠊎愛調去當遠个位所，無法度再分錢阿婆。」毋過，銀行个人想出一條計謀，大家湊等鬥鬥看，鬥出三千塊，阿婆係有來，就照樣分佢領。
到第六年阿婆也過身咧！你講臺灣盡靚个風景，係人情味無？
