阿姆講補鑊鳥个古
【圖、文／李秀鳳／國立中央大學客家語文碩士】
發音人：李秀鳳（海陸腔）
前一駁仔，轉新竹莊下看老哀，順續帶等賴文英教授个《行孝繪本：客語民間文學故事選》，想愛講古分阿姆聽。
阿姆當好聽𠊎講客，前三年參加客語社會組講演比賽，輒常講演分阿姆聽。見擺阿姆就聽到當入文，緊聽緊頷頭，聽𠊎講煞，佢會煞猛拍手安腦𠊎恁慶恁會講。
作者與家母
𠊎講賴教授寫个〈補鑊鳥个故事〉分阿姆聽：
頭擺、頭擺，有兩公婆摎厥哀仔共下戴到莊下，阿姆个目珠看毋著。
老公：「這兜錢你拿去買腈豬肉，煮分阿姆食，摎阿姆个身體補補啊了。」
餔娘：「𠊎知。你做你放心出門做事，𠊎會好好照顧阿姆。」
餔娘心肝肚想：「反正阿姆看毋著，這兜錢省起來自家用。𠊎去門脣个醃缸肚捉幾條湖蜞，準做腈豬肉煮分阿姆食。」
心臼：「阿姆，𠊎特別煮豬肉湯來摎你補身體。」
阿姆：「恁好唷。毋過，這豬肉噍起來仰韌𫠄𫠄仔？」
心臼：「你忒久無食著豬肉了，正會試著怪啦！」
阿姆：「恁樣啊！」
過了一駁仔。
老公：「阿姆身體有較好無？」
餔娘：「有啦！你放心。」
老公：「這兜錢你再過拿去買兜腈豬肉，煮分阿姆食。」
餔娘：「好。你出門做事愛細義。」
結果餔娘又摎錢㘝起來自家用。
又過了一站仔。
倈仔：「阿姆，身體有較好無？」
阿姆：「總係恁樣，共樣啦！」
倈仔：「若心臼煮个豬肉湯有好食無？」
阿姆：「毋會難食啦！就該豬肉噍起來韌𫠄韌𫠄，吞毋落肚。」
倈仔心肝肚就試著疑狐。
第二日，老公出門前又交代厥餔娘去買腈豬肉，煮分阿姆食。毋過，老公並無正經出門，顛倒囥到草叢裡肚偷看。結果佢看著厥餔娘在醃缸肚捉湖蜞，煮分阿姆食。
老公閼（譴）到會死，就去問厥餔娘。
餔娘：「𠊎無啊，𠊎無啊。」
老公：「還講無？這碗肚係麼个東西？」
餔娘：「該…該…該係較烏形个細垤豬肉定定啦。」
老公：「你跈𠊎來看。這醃缸裡肚係麼个？」
餔娘就頭犁犁仔探落去看。
老公閼（譴）啊去，就用手項个刀嫲，摎餔娘个頭那剁啊落去。醃缸隨就弇起來。
過忒幾日仔。老公聽著醃缸裡肚有聲个樣仔，就摎蓋仔拿起來。結果飛出一隻補鑊鳥，緊喊等「補鑊、補鑊」。聽起來就像餔娘罵厥老公「夫惡、夫惡」个樣仔。
這就係客家當有名个補鑊鳥个故事。補鑊鳥个故事，係愛勸話人愛有孝。不孝个人，結局會得著處罰。
故事講煞，換阿姆過講一遍分𠊎聽，想愛考一下阿姆个記才，敢正經緊來緊退化？
阿姆講：「頭擺…有孝个倈仔割一垤瘦豬肉轉來，喊厥餔娘煮分阿姆食，佢就出去賺錢。心臼摎湖蜞放落醃缸肚，瘦豬肉煮來自家食，湖蜞煮分厥家娘食…」吓！無想著𠊎講个情節，嗄分阿姆改忒去，𠊎抗議書裡肚毋係恁樣講啦！阿姆講頭擺人係恁樣講个呀！阿姆還講這個心臼摎湖蜞捉著來翻腸仔，摎腸仔翻淨正煮分厥家娘食。（哇！恁工夫喔！）
𠊎姆續等講：「該個阿姆目珠青瞑看毋著，佢摎一垤瘦豬肉用紙包起來楔在褲頭項，等厥倈仔轉來拿分佢看，摎厥倈仔講，你買這麼个瘦豬肉，還難食喔！韌咭咭，吞毋得落。厥倈仔拿起來一看，啊哦！麼个瘦豬肉，係一垤湖蜞乾。閼捽捽仔个倈仔行入灶下，摎醃缸个蓋仔掀起來，正知厥餔娘畜一醃缸个湖蜞，喊厥餔娘來看……無幾久，醃缸肚飛出兩隻補鑊鳥…」
（客家人講个補鑊鳥，就係白腹秧雞。攝影∕陳敏慧）
𠊎豬接杓：「敢毋係飛出一隻，仰會飛兩隻出來？」阿姆講：「戇嫲得斯，一隻公个、一隻嫲个，毋正會生卵孵子。」（哈哈！有理喔！）
阿姆最尾講：「補鑊鳥長透愛噭到嘴角出血，正有蟲仔趖出來分佢食，正經已衰過。麼儕喊佢做人心臼个時節，毋好好有孝厥家娘。」（詳細看補鑊鳥个嘴角，有影喔！有一搭仔紅噹噹，像出血樣。）
客家人流傳下來補鑊鳥這隻古，就係民間文學。民間文學最大个特色，就係變異性：無共樣个年代、無共樣个地方、無共樣个人來講共隻故事，都有無共樣个情節，這係民間文學當生趣也係最餳人个所在。𠊎到這下還做得聽阿姆講恁精彩个古，正實當幸福。
