打網球
【圖／廖千慧；文／邱一帆／國立中央大學客家語文暨社會科學學系客家研究博士班】
發音人：邱一帆（四縣腔）
國小時節遊遊野野个心情
分有心个校長同主任網入
軟式網球个場地
仰般形打球仔
仰般形企位仔
仰般形攻防
仰般形算分
還深刻在吾个腦殼
球仔發出
一擺過一擺
掛網抑係彈跳
自信抑係失落
變到𠊎成長个養分
仰般鬥搭
在互相協調同合作个雙打
輸抑係贏
毋係比賽个結局
公平公正公開
還有一點謙虛
帶等𠊎行向未來个人生路
多年過後
轉到自家个母校
家鄉个校長摎主任
還記得阿番牯
識打過網球
在番綻番綻个童年時節
