中央大學電子報

返台之前

【文、圖／鍾榮富／南臺科技大學應用英語系講座教授】

　　七月通過博士口試以後，先出去遶尞仔兩禮拜。歸到校園，馬上進行論文修改个工作。大概講來，寫論文係粗胚，修改正係幼事。愛先考慮口試教授个問題，還愛考慮佢問這問題个原因，前後花了二隻月半，正得到指導教授个認可，繳出論文。到今還記得，指導教授看忒最後版本，認為做得送出去該時，佢同𠊎慢慢仔講，「還係愛再從頭到尾看一擺，繳出去以後，這論文就跈你一生人了。莫像𠊎恁仔，繳交出去以後，正發現論文少了一頁，變做𠊎一生人个遺憾。」聽着這句話，𠊎盡毋信，還去圖書館查厥論文，真實少了一頁。故所佢這句話到今𠊎都還記得，𠊎乜會提醒自家个學生仔，定著最後還愛再檢查一擺。

　　改寫論文个同時，就開始準備歸台灣个各種雜事。留學生愛歸家門，最重要个當然就係書，特別係未來教書愛用得着个專業書籍，再多都還還無罅个樣仔。𠊎去附近个新舊書店遶了幾下擺，每擺都買了盡多書，後來算算仔，淨書就裝了二十零箱，其中有四五箱係影印个，主要係難得買着，又過難得尋着个文獻，比論講橋本萬太郎1973个The Hakka Dialect (客家話研究)，就係當時已經買毋着个重要客語研究專書。該當時，兩岸客語研究論文還毋多，用英文寫个作品變啊盡有參考價值。

　　書、衫褲、音響同其他毋盼得丟忒个東西，東裝西裝，乜有幾下十箱。面對面前恁多雜貨，愛尋人共下去芝加哥港口租海運貨櫃。𠊎該年盡幸運，堵好有兩个同鄉愛歸台灣，一個去清華，另外一儕去嘉義教育大學。𠊎兜三個人租了兩個大貨櫃。訂了貨櫃，就愛租貨車將東西運送去港口。出門在外，每一個人都有十八般武藝，平常看起來普通普通个同鄉，無想着佢人細細隻，嗄曉得駛二十噸个大貨車。佢同車仔駛到屋門口，𠊎將家拉伙作搬上車以後，三儕共下去港口。佢兩儕開貨車，𠊎開轎車（愛同佢兜載歸香檳）。到港口頭前，來回个車仔當多，出入港口个貨車又大又高，害𠊎在十字路口等了五六分鐘，總係無辦法衝過大路。後來，看著一個人高馬大个美國人，左轉到一半，停一下車仔，同𠊎緊擛手，大聲喊I’ll cover you (𠊎會帶你過大路)，可見到位都有親切个人。

　　同東西送入貨櫃，歸到屋下，接等去辦離校手續。主辦ESL(English as a Second Language)个單位同𠊎講，𠊎無通過ESL个考試，做毋得畢業。原來伊利諾大學規定，若係托福(TOEFL)毋超過600分，愛補上ESL个課。𠊎記得第一擺去上課，先生分𠊎兜寫作文。先生看忒作文，宣布吾作文盡好，毋使再修ESL个課，這係在教室講个話，無任何根據。好在當時任教个先生還在學校，佢記得𠊎，因為𠊎係佢教書幾下年來，唯一通過英文作文認定毋使修課个人。