府城台南客家遊
【圖、文/ 鍾孝昇】
發音人：邱新春（四縣腔）
兩隻月个暑假就愛結束了，利用這禮拜，轉母校台南師院所在个台南市遶尞，同時乜來拜訪台南市个客家景點。
台南敢有客家个景點？這點大家可能當疑狐。無毋着，雖然講台南市个客家人口比例無當高，毋過出發前，𠊎在網路項發現台南還係有客家先人留下个遺跡。同時，乜知得台南市政府當用心推廣客家文化，毋單淨設立客家文化會館，出版客家地圖，還摎台南市兩間做得代表客家个宮廟，納入古蹟來保護。一間係國定二級古蹟个「三山國王廟」，另外一間就係六堆客家前輩所設立个「擇賢堂」，這間市定三級古蹟个擇賢堂，就係𠊎來台南遶尞个第一站。
擇賢堂位在台南市中正路巷仔肚，脣頭就係日本時代个台南州廳，還有「全臺首學」名稱个台南孔廟。擇賢堂在清朝光緒五年，由美濃鎮竹頭角，虔誠信佛个古帶娣姑集資興建，因爭信徒大部分係來自六堆个客家人，當地人就摎這間廟安到「客人廟」。除忒供奉觀音娘，分信眾來參拜，擇賢堂因為在鬧熱个街肚項，故所當多客家學生仔來台南讀書，抑係講鄉親來台南看醫生，戴較遠个都會暫時在這歇睏，做得講係六堆客家鄉親來台南街肚辦事、求學，臨時个旅舍、學寮。
頭擺去到外鄉个客家人，特別係來到河洛庄，語言摎生活方式無共樣，輒常會分人看無。擇賢堂提供客家鄉親暫時歇夜个服務，分佢兜做得定定仔熟悉生份个環境，做得講，對佢兜有盡大个幫助。
從文史資料知着，擇賢堂殿前有兩張神桌，係台南師範學校畢業个六堆美濃子弟集資捐贈个。𠊎想乜在台南師院讀書个𠊎，若係提早五十年來到這位，定着有可能會借戴在擇賢堂這位了。
今晡日來到擇賢堂，原本想愛入去參觀，毋過因為防疫个關係，無開放，實在當打爽，𠊎就在門口翕幾張仔相片，留做紀念，等另日開放以後，正過來拜訪。
（位在台南市中正路巷仔肚个擇賢堂）
離開擇賢堂，𠊎來到台南市客家文化會館，這間位在水萍塭公園肚，民國九十九年正啟用个會館，做得講係台南市保存客家文物盡完整个位所。
客家文化會館外牆用客家傳統灰底白色為基調，過用桐花在牆面項做裝潢，表現出客家个特色。在會館裡肚，展示異多客家藝文作品摎頭擺个生活用品，除忒分市民認識客家文化外，乜𢯭手推銷台南个觀光旅遊。
在台南市政府出版个客家地圖當中做得發現，其實在台南偎山个玉井、楠西也有當多个客家莊頭。像楠西區个鹿陶洋江家聚落，係早期客家先民開墾个「單姓傳統莊頭」，2009年分台南市政府登錄為文化資產，乜係全台唯一个「客家傳統聚落建築群」个文化資產。雖然今這下，戴這个江家人都毋會講客家話，毋過大部分江家人還係知道自家个祖先來自客家庄，佢兜乜有異多風俗，像「入丁」摎「宋江陣」，都係客家合著河洛兩隻族群文化來个，在河洛人佔大部分个台南府城，客家文化還係分子孫來守着。
江家聚落附近還有一隻地方安到「梅嶺」，梅嶺原名係弓蕉山，民國三十幾年，苗栗有三隻家族對新竹、苗栗徙到這，在半山排項種弓蕉，後來又改種梅仔樹，故所又改名安到梅嶺。因爭最近十過年來，梅仔个外銷市場，分大陸个梅仔食淨淨，這位个農民高不將就來轉型賣自家个梅仔加工食品，抑係開餐廳賣梅仔餐。像客家有名个薑絲大腸，這位就用梅子个酸味取代酸醋，變做「梅香肥腸」，顛倒變做梅嶺地區獨特个客家菜。這乜看仔出客家人做得將傳統摎現代結合个精神。
在台南市罕得看着个客家建築當中，擇賢堂相續了客家族群晴耕雨讀，詩書傳家个傳統，在鹿陶洋江家聚落、梅嶺乜看仔到客家子孫跈等時代，創作新客家文化个用心。這擺台南府城客家景點个遶尞，做得感受着在這滿奈仔都係學老人个台南大城市中，客家人還係用無共樣个方式，繼續傳承个客家精神。
