遶山花遊記
【圖／文／羅寶貴】
發音人：羅寶貴（四縣腔）
頭份駛車新埔鎮 來回需七十公里 來到九芎湖行尞 天時地利人和挼
輒常遶尞喜洋洋 行到陳家農場靚 環境治理乜盡慶 牛造型竳立園區
象徵客家堅毅情 看到鴛鴦池望去 鴨仔鴛鴦在泅水 雙雙對對搞水樂
邊脣紅啾啾靚花 大叢淰開盡打眼 觀南步道行往上 叉路山友相借問
一對公婆迎面來 問路順續打嘴鼓 用親切客話招呼 感心客家人熱情
山坡肚上崎好行 望慢看遠山風景 探頭看天頂雲層 浮雲徙位有時遽
烏雲打堆跈等來 日頭乜變陰天了 聽著雷公響大聲 堵着愛下山叉路
緊看愛行哪條路 選擇較近行下山 沿途鳥仔啾啾滾 農家種柚打當結
番瓜盡多路脣種 瓠仔忒老做瓠杓 烏白彩色揚蝶仔 草欉果樹飛上下
自由自在成雙對 頓恬欣賞遽翕相 漫步轉車仔裡肚 阿姆哀黏時落雨
該載及時入車內 無斯分雨涿歸身 這擺路途有較遠 心情暢快當歡喜
雖然人生臨暗時 歲月還係拗蠻長 夕照正當燦爛中 盼望天烏得較慢
尋伴共享蹶山趣 順其自然享自由 慢慢行向暮年路 樂線看待日落時
退休生活个希望 人生小小个心願
