屎尿味緒多（二）
【文、圖／彭欽清／國立政治大學退休教授】
發音人：彭欽清（四縣腔）
聽講原在有人行路去長途旅行，淨帶一隻雞仔一隻狗仔，佢食雞卵，雞仔食狗屎，狗仔食人屎，恁樣就解決歸路仔食个問題。聽起來像講天缺，毋過乜證明自古以來狗係食屎个。
頭擺莊下有个細人仔吂會用糞缸，屙在禾埕下个屎做下都係狗仔包忒。已輒看著鄰舍个細孲仔，褲脫啊忒狗仔就跈在厥屎背尾，正經係打屁安狗心。另外莊下人相罵罵到毋擔輸贏吔，就會撥屎撥尿，聽講分人撥着个會衰三年。
人既然生活項離毋開屎尿，當自然在日常生活肚會已輒用著屎尿个字眼。比論講：佢總係好屙濃滑血、你莫在該屙痢屙肚、尿水就無好食、分佢搣到尿汀汀仔、懶人屎尿多、屎出正來挖糞窖、該隻食屎个、總係會屙大坏屎，做就無半撇。
客話恁多用屎來講形容人个詞彙肚項，「挶屎」用來一等傳神，用來講人毋搭人、大傲。比將講：還挶屎、挶麼个屎。輒常還會同挶字省忒，就講還屎，乜做得講屎棍條，講人一等挶屎，就用挶屎轟天來形容。
客話會用恁多詞彙來形容人大傲，看吔出客人死惱這種人。故所長輩在屋下會緊教細人仔毋好挶屎、看著隔壁鄰舍愛相借問，同時教細人仔愛雙手兜茶分人食，係無，會分人認定講細人仔毋知上下、毋識人、挶屎、無家教，做大人个當無面子。
大人緊教毋好挶屎，細人仔就學著／愛仰仔應對進退。毋好挶屎這句話除忒教細人仔對人愛親切以外，也教細人仔愛體恤人，正毋會毋知自家刺著人。記得還細該下在路項同㧡等大肥个鄰舍挨身過，鼻就撚等鼻公，吾姆在脣項看著跈等話𠊎講：「毋好恁樣，會分人講挶麼个屎哦，自家个屎毋會臭係無？」當時試著吾姆實在係已勉強人，等到自家大到做得㧡肥淋菜該下，正體會著佢老人家个話。
同任何詞彙共樣，挶屎兩隻字用久了嗄儘採用。像同人敬酒對方毋食係挶屎；明知係犯法个事情，硬愛尋關係去講，結果對方講無法𢯭手，乜係挶屎；有好歪事，地方首長、民意代表無去參加，還較係挶屎。結果挶屎這隻詞，從單純形容人大傲嗄變到形容所有逆自家个人。當多恩恩怨怨，輒常就係因為雙方都認為對方挶屎造成个。愛化解這個恩怨，絕對毋係撥屎撥尿做得解決个。愛敨開這隻結，就愛同毋好挶屎个本意—對人愛親切，愛會體恤人—好好仔發揮正著。
到這下，鄉下个老屋仔一間一間仔翻新，糞缸、尿桶看毋着了，也看毋着狗仔跈在細孲仔个屎背尾流口涎水了，逐家屋都用抽水馬桶个便所。毋過無整體个規劃，大體个屙糟水都流到壢溝過圳溝，盡尾流到河壩，造成嚴重个污染。另外，耕種个人日見日少，化學肥料又方便，原在大家搶等愛个糞堆肥無人愛了，垃圾哪就堆，搣到山毋係山，水毋係水。
各個地方个主事者，眼光愛放遠兜仔，較抽間啊同下水道過垃圾場个工程好好仔規劃好來施工，莫再過同靚靚个山水準係集屎尿垃圾个所在。無就會像台北个基隆河過淡水河，污染到判死刑吔正開始整治，該就正經係屎出正來挖糞窖了。
