著大獎
【圖、文／徐佳妤／臺北市客語支援教師】
發音人：徐佳妤（南四縣腔）
九月二十四號拜六朝晨，𠊎著著大獎咧！無一息仔暢樂，嗄係艱苦个起勢……。
用快篩試劑驗出兩條線，實在無時間去愐想：仰仔注吔三擺疫苗，還會著獎？趕緊先打電話通知學校請假，過上網查離屋下最近个診所電話，加診所LINE以後，就視訊問診，喚倈仔去同𠊎拿藥仔，護理師會通報衛生所，無幾久，衛生所分𠊎一封簡訊：COVID-19確診個案自主回報，這愛細義寫，係講寫毋著，愛改，乜愛在二十四點鐘之內修改。大約兩點鐘，就接著衛福部个簡訊，分𠊎「居家隔離通知書」，在七十二點鐘之內，定著愛下載。
人，著病，既經毋爽快吔，毋過，還係愛刻耐仔回報。診所个護理師三不
二時會LINE兜仔訊息分𠊎，像：病程、飲食原則、每日問吾个症頭……。打白講，因為有v護理師个燒暖關心，感覺著毋係自家一個人去面對病痛。對𠊎來講，塞鼻、流鼻水、頭那痛，還做得忍。顛倒盡清苦个係：蛤蟆胲蓋痛，這痛，就像分魚骨頭哽著，連吞口涎水都會痛！有時蛤蟆胲一癢起來又嗽到會嘍，嗽到強強會翻肚。人，都共樣，愛等到著病咧，正知：做得「好食、好睡、好屎尿」係一件嶄然幸福个事情啊。
因為自家畀隔離，無法度出門教書、買菜，淨做得跼在間肚，又蛤蟆胲痛，只好食粥抑係食麵，歸日仔殗殗犁在眠床項，麼个都毋想停動。第三日，有較好息把仔，𠊎就裝一桶漂白消毒水，開始抺馬桶、洗面槽、電火開關、桌仔、凳仔，大倈仔就倒地圾、上網喊Uber Eat、搓地泥、收衫褲，看著平常好勢慣吔个細人仔會主動𢯭手，心肝肚蓋安慰，期待十月初二就做得出窿咧。
九月二十七號拜二朝晨，𠊎還目睡摸些，倈仔突然搉門講：「媽媽，𠊎乜著著大獎咧！」𠊎：「……」。
