做別人个石跳仔
【圖、文／李秀鳳／國立中央大學客家語文暨社會科學學系客家語文碩士】
發音人：李秀鳳（海陸腔）
你看過河壩肚个石跳仔無？你識踏過石跳仔過河壩無？一般來講，在水流量較平順个山溪抑係坑壢，會有人放幾隻大石牯分人踏等過到對岸，避免涉水過溪。這幾隻分人墊等過河壩，褲腳摎鞋襪正毋會溼溚溚个大石牯，就安到石跳仔。
7/31在中壢个大河壩小書店，新竹詩人陳美燕舉辦《單單一蕊打碗花》新書發表會，當榮幸在現場朗讀佢得著108年閩客語文學獎客家語現代詩社會組第一名个〈石跳仔〉，這首詩寫到當湛斗，分人緊讀緊入心。
美燕解說佢創作个〈石跳仔〉，石跳仔就係「墊腳石」，係「巨人个肩頭」，分人踏穩了後，正做得行到更遠。熟事美燕6年零，看佢在面書頂高輒常寫詩、寫散文、寫小說，從來毋識推懶過。當承蒙美燕做𠊎个石跳仔，因為有佢个鼓勵摎榜樣，𠊎也跈等開始寫客語文章，也因為佢這隻石跳仔無生溜苔，無害𠊎跢落河壩肚。
𠊎試著做得做別人个石跳仔，係當幸福也當沙鼻个事情，表示你有能力摎手巴掌向往下幫助別儕，不管係阿公阿婆做後輩个石跳仔、爺哀做子女个石跳仔、先生做學生个石跳仔，𠊎相信佢兜定著係感覺當安慰摎驕傲。
這幾年，𠊎在小學、國中教小朋友講客，漸漸仔𠊎也試著自家有本等做細人仔个石跳仔，比論講，對該兜暮固、孤栖、讀書較毋壁个學生，𠊎會多鼓勵、關心，分佢兜試著會講客，係當慶个事情。對該兜煞猛學講客个小朋友，就訓練佢兜去參加朗讀、講古、講演比賽，得著好成績，分佢兜體會著曉講自家个母語，係仰般光榮个事情。還有一兜讀國中、高中个學生，若係堵著比賽，會倒轉來尋𠊎指導，甚至有準備考大學个，請𠊎這個先生摎佢寫推薦信。
能夠做學生个石跳仔，幫助佢兜行較遠、較闊个路，正實當樂暢。
（一群細人仔踏等石跳仔過河壩。攝影/吳慶杰‧金山面文史工作室負責人）
〈石跳仔〉 李秀鳳/朗讀 陳美燕/原作
山坑面个石跳仔
一隻連一隻
像阿公阿婆彎彎个背囊
痀在水竇
老人家無講出嘴个痛惜
在這向輒輒吩咐
定定仔，細義行
堅耐个石牯，分𠊎細步細步徙到
平安个對向
水圳面个石跳仔
一隻連一隻
像爺娘打開燒暖个胸脯
坐在水竇
子女無注意个毋盼得
在這向恬恬期待
腳步正，莫停跎
定疊个基石
分𠊎一步一步𧾷兼【kiamˊ】到
順序个對向
河壩面个石跳仔
一隻連一隻
像先生弓等砸磳个肩頭
跍在水竇
學生體會毋著个心力
在這向再三叮嚀
心肝在，向前行
穩當个磐石，
分𠊎大步大步行到
理想个對向
無生溜苔个石跳仔
分亻恩俚跺核核
安全通過逐條
人生無共樣个坑壩
無求回報个石跳仔
也歡喜亻恩俚
再過踏轉
出發个對向
