有閒來五寮──五寮創生
【文、圖／薛常威／國立中央大學客家語文暨社會科學學系在職專班碩士】
發音人：薛常威（四縣腔）
新北市三峽區五寮里係一隻客家人个聚落，早期有當多自桃園，新竹，苗栗該片徙過來開墾荒地移居過來个客家人，客家人口超過六成，係北部客家二次移民人口最多个客家庄，五寮居民以前當多係以開採樟腦摎焿油為生，今這下因為豐富个山產資源，變成北部最大个竹筍產區，還有「新北竹筍之鄉」个好名聲。新北市府客家事務局2021年，在五寮客家庄成立五寮山客創生駐地工作站，推動地方創生，駐地工作站將摎三峽區公所合作，辦理還較多个客庄創生體驗活動，增加摎在地居民个連結。
十過年前就在五寮展開社區總體營造打造「客家形象商圈」，往五寮个路脣，店家外牆掛等竹仔做个形象商圈招牌，一路上有桐花、綠竹筍、客家藍衫做裝飾，當有客家意象，分旅客做得感受客家生活，認識客家文化。
駐地工作站摎五寮國小合作，推動美感摎環境教育，運用在地豐富个竹材，摎創生理念結合設計新个課程。透過學生創作摎竹仔變成有風鈴功能个花器，分竹材連結常民生活，並加入客語教學，分學生毋係單淨創作藝術，乜做得學著客語知識。
駐地團隊自2021年駐點開始，盤點在地原客關係、信仰、產業。未來會續等進行在地客庄文化資源盤點，像客家伯公信仰、竹筍產業、樟腦古道文史調查，將於今年11月5到6號在五寮國小辦理成果展，透過居民共創客庄、青農培力課程、地方擾動小旅行走讀，凝聚五寮社區意識、加強青年培力加入創生團隊延續創生動能，振興在地發展，分五寮街區重新靚起來。
