平鎮義民廟个正義神像
【文、圖／徐貴榮／國立中央大學客家語文暨社會科學學系兼任助理教授】
發音人：徐貴榮（四縣腔）
平鎮義民廟本來安到「義民亭」，清朝乾隆56（1791）年，桃園廣興庄總理宋廷龍感念着義民爺个偉大犧牲，桃園一搭仔愛去新埔枋寮祭拜義民爺，路途恁遠，交通又毋利便，就帶領眾信士去新埔義民廟分香轉來，捐出土地，在宋屋創建義民廟，好分桃園地區个信士參拜，安名「義民亭」。咸豐7（1857）年，總理宋寶雲募捐錢銀，起加前堂過兩片行廊，改名安到「褒忠祠」，到這下人講「平鎮義民廟」。（圖1）
圖1 平鎮義民廟現貌（2022.10.28攝）
平鎮義民廟同其他義民廟無共樣个係，佢同中壢新街仁海宮共隻「大中壢十三庄」祭祀圈，包括中壢、平鎮、楊梅這兜地區个民眾，特色就係將「中壢十三庄」分到14隻祭祀區，聯庄輪值兩廟个年度杈開，當年輪值平鎮義民廟祭典个莊頭，七年後輪值仁海宮祭典。逐年舊曆七月二十義民生，分別祭拜義民爺、慶讚中元，舉辦神豬、神羊比賽、㓾豬公、各式各樣花燈藝閣展覽、打八音、做大戲。家家戶戶㓾雞捋鴨，準備豐豐沛沛請人客，安到「中壢大拜拜」、「平鎮大拜拜」。到這下雖然無請人客咧！畜豬公个也少吔！毋過逐年還係當鬧熱。
毋單止恁仔，還有較無共樣个係，佢有像關公樣仔个紅面神像金身（圖2），代表「正義」个客家義民精神。聽講在日本時代後期，為着愛消滅臺灣人个中國傳統風俗、思想，不准人拜阿公婆、民間信仰神明，各郡各庄大起神社，民眾無奈何，高不將同神像囥起來。毋敢囥到屋下，就囥到稈棚草堆肚，日本警察得到消息走來撨，拿銃仔掛刺刀亂刺亂揰。背尾發現義民爺神像一滴仔就無傷害着，大家都講係義民爺顯靈。
圖2 平鎮義民廟个紅面義民爺神像，座下還有當多細神像（2022.10.28攝）
日本人來接收臺灣，無想着來到平鎮，堵着客人組織个義軍抵抗，開出保台抗日个乙未戰爭第一銃。當時个義軍就係在這義民廟作前哨，打擊日本兵。「大湳尾戰役」失敗過後，又過發生「安平鎮戰役」、「龍潭陂戰役」，使得日本兵死傷已多，無恁順利來接收臺灣。民間也有一種講法，唐景崧个「臺灣民主國」失敗過後逃轉大陸，駐守在臺北个「河南兵」，想愛尋唐景崧轉大陸，就背等銃仔，繫等錢銀，跈等縱貫鐵路，「慶慶鏘鏘」一路行等下來。來到中壢、平鎮一搭仔，聽講當時義軍在義民廟，識發公告講，這兜河南兵毋抗日，想愛逃走，義軍缺少糧草、銃仔，去拿來買糧草打日本。係講麼人敢囥佢兜，全部愛剿忒，故所後來正會發生「河南兵」分人逐到中壢車頭背後一隻陂塘肚㓾淨淨个慘事，毋知有影也無影？
義民爺係客家先賢這兜，為着保衛鄉土，犧牲性命，正換來後代个生存。對客家人來講，義民廟不單止係信仰个所在，義民爺也係重要个守護神，還有一種當特殊感情。早期逐隻月會定期「奉飯」，當多人在屋下會辦理菜飯「犒軍」，慢慢仔變到客家特有个「義民節」慶典。
這下个平鎮義民廟樣貌（圖1），係在民國38（1949）年，「大中壢十三庄」人士成立重建委員會，選陳貴邦做總理，樂捐重起个五開間、兩進兩橫屋大廟，並重刻義民爺神像座位。神像下還有當多細神像（圖2），係大神像个分身，做得出巡、分人請去別間宮廟做客。後來經過修整，加起雕樑龍柱，塑龍飛簷，非常个壯觀。環南路同復旦路口有一個山門（圖3），過幾十公尺復旦路23巷入口又有一隻山門（圖4）。今（111）年在12月14到18（農曆11月21到25）愛舉行慶成祈安五朝圓醮「打醮尾」，到時又有一番个鬧熱。
圖3 第一道山門，在環南路同復旦路口（2022.10.27攝）
圖4 第二道山門，在復旦路23巷入口（2022.10.27攝）
廟地當闊，後背設有涼亭摎花園，分民眾到廟項參拜過後，做得落去休閒遊尞，觀賞園肚各式各樣个花草同樹仔。民國90（2001）年分桃園縣政府選做歷史建築之一。這下係平鎮个地標，也係有名个觀光景點，附近仔還有舊年新起个「1895抗日保台紀念公園」，值得去遶尞。
※本文的「着」，同教育部訂的「著」之意。
