廣東第一才子──宋湘
【圖／廖千慧；文／何石松】
發音人：何石松（海陸腔）
歷史上有盡多介才子。比論講，元朝辛文房寫介《唐才子傳》，就介紹有398個才子，寫該「青山依舊在，幾度夕陽紅」介明朝第一才子楊慎，還有江南才子唐伯虎，更有金聖嘆評點介《六大才子書》等等，全部都係才思敏捷介才子，佢兜大部分係當時，無斯後來尊佢為才子介，實在了不起。不過，盡少像清朝時節，一個客家人，由於有文學等多方面介才華，為了百姓，能夠直接在金鑾寶殿上，分嘉慶皇帝封為「廣東第一才子」介，該就係──宋湘。
宋湘，廣東嘉應州人，係清朝時介文學家，政治家，教育家，書法家。佢從細就當聰明，係一位神童。聽講佢細細去應童子考試時，因為毋識路嗄赴毋著考試。佢拜託主考官分佢落去考，主考官看佢恁細，愛雕琢佢，就講愛出隻對仔分佢對，對得著，正分佢落去考。上聯係：「急水推沙粗在後。」有愛誚㸐佢介意思，無想著佢黏皮應講：「風車絞穀冇在前。」結果，嗄考著頭名。
有一擺，宋湘愛去考試，經過惠州，因為所費毋罅，聰明介佢，就走去拜託知府解決。知府知佢係人才，想愛考驗佢，斯喊佢能在五步之內，用東南西北入對聯，就摎佢相添所費。宋湘當下就講：「南海有人瞻北斗，東坡此地避西湖」，正經，東南西北對著當好，知府盡歡喜，就幫佢渡過難關。
又有一擺，路上堵著一個村姑，佢知宋湘係才子，就出對聯分佢對：「白水灘前，白屋白雞啼白晝；」宋湘就應講：「黃泥崗上，黃家黃犬吠黃昏。」村姑聽著非常歡喜，愛送宋湘青菜，宋湘毋敢接受。
宋湘為人正派，文才當好，出口成章。路上堵著蓮花妹，出對仔對，也對著已入味。比論講，蓮花妹出上聯：「老公打魚老婆食，老打老食。」宋湘回講：「新舅裁衣新郎著，新裁新著。」蓮花妹又出：「紙剪鯉魚，難買難煮難待客，」宋湘斯講：「壁上畫虎，不驚不嚇不傷人。」兩儕對到咿噢椰，像「兩人該牽鋸，有來又有去」共樣，當生趣，又當搭碓。佢又當會唱山歌，尤其係摎蓮花妹介尾駁尾山歌，盡多一語雙關，文學性當高。
宋湘一生人服務公職，勤政愛民。聽講佢升任湖北督糧道，在歡迎會上，有人看毋起廣東來介老人家，就出對聯分佢對。上聯講：「東鳥西飛，遍地鳳凰難下腳；」有高高在上，鄙視之意。穩重聰明介宋湘斯對講：「南龍北躍，滿江魚鱉盡低頭。」黏皮就摎佢壓過去，害該隻人，面舐舐仔，當敗勢。屋下人知老爺做大官，就寫信仔講愛起屋買田。佢回信講：「子孫係像𠊎，買田做麼介？子孫毋像𠊎，買田又仰般？」這封信仔感動盡多人。同時，佢介字也當有名，佢係嶺南四大書法家之一。
宋湘在雲南期間，更表現了佢介才情，愛民，清廉，智慧。一心照顧百姓，為了解決該湓河湓崁，山崩地裂，發大水打走當多人介問題，還特別不辭山遙路遠介艱辛，單人獨馬介上京請求救濟。恁堵好，又係嘉慶皇帝介壽誕之期，無人敢在這隻時節，講該兜摎祝壽無關介事情。萬一觸著皇帝介逆鱗，該斯會無命呢。無想著，忠心耿耿介宋湘，全無擔心自家介安危，提出嚴重介水災，正經係「烏𪐞冇地豆──實在無精。」
好得嘉慶皇帝，早斯聽講佢介才名，就當場考佢，皇帝講一句，喊佢就愛念出一句詩。皇帝講：皇后昨暗晡降隻細人仔。宋湘隨口念出：「吾皇昨夜降真龍」皇帝再講：係隻細妹仔。宋湘念：「月裡嫦娥下九重；」皇帝又講：已經死忒咧。宋湘對講：「想必人間留不住，」皇帝包尾講：分水浸死介。宋湘應講：「翻身跳入水晶宮。」哇，果然係好詩啊！
接等，宋湘又當場寫出一副對聯：「 順穆康寧，雍然乾德嘉千載 ；治平熙泰，正是隆恩慶萬年」，橫批係「上大人」，摎順治，康熙，雍正，乾隆，嘉慶等全部入對聯之中。嘉慶看了以後，暢到耐毋得，非常歡喜，黏皮封佢為「廣東第一才子。」同時，馬上下旨救災，圓滿解決了問題。難怪百姓感念佢介恩德，還特別摎佢做生祠，後來離職時節，雲南人送佢，毋盼得佢走介人，人山人海，大人細子，擠做共下，場面感動人心。
佢，哪止係廣東第一才子定？
※本文的「介」為大眾通用的「的」，同教育部訂的「个」之意。
