尋味
【圖、文／黃美貞／台北市光復國小教師】
發音人：黃美貞（四縣腔）
愐著這下个人，愛食麼个都當利便，打一通電話無就手機仔點幾下仔，愛麼个東西就做便便送到到。毋過，𠊎還係盡想念阿姆自家做个烰菜。
從細戴伙房大，食飽晝歸大陣細孲仔就像野馬共樣，歸伙房緊走，搞懶了、肚飢了，就會轉去自家个竇尋食。阿姆雖然日日做到兩頭烏，還係會抽間準備點心來塞𠊎兜个豺嘴空，烰菜就係輒常食著个好味緒。
在莊下，每家每屋都有自家个菜園，一年透天都有菜好摘，係愛做烰菜，就將番瓜、番薯刨絲，現摘个七層塔、芫荽仔洗淨放到盤仔項，一盤放一項材料，一碗麵粉、兩粒卵加一杯水同一息鹽花、胡椒粉摝勻來，變成一碗粉漿，等油滾到放筷仔會起泡，正好放材料落鑊，一撮番薯絲、一撮番瓜絲同兩皮七層插，加一息芫荽仔，搵兜仔粉漿，差毋多手盤大就好，扁扁仔較遽熟，份量乜較堵好。盡重要个係愛烰兩遍，第一遍係將菜个水份逼出來，第二遍搶酥就係烰畀酥，香氣正會出來。逐擺，阿姆兜出來一錫盤錐錐个烰菜，三兩下仔就搶到淨淨了。
現代網路當發達，想學做東西乜毋係難事，記得舊年愛出年假該下，冰箱還異多菜尾，半粒芋仔、一矻甜粄、一條番薯、一條紅蘿蔔同兩條蒜仔，一滴半滴做堆肥乜打爽，換一个想法，該就照等網路个達人紹介拚冰箱料理，從刨絲一步一步定定仔做，無看真就看加兩遍，係跈毋著就頓恬一下乜做得，正經有影，改良个烰菜中間加甜粄，甜粄韌韌菜酥酥，鹹腥鹹腥合兜仔甜味，食起來个口感特別無共樣，用現代个方式來改良傳統點心，一屋下人乜說到奈得毋得。
回憶總係盡甜、盡靚，但係盡好食个往往就係食毋著个，打幫科技个人性化，總愛肯學，毋使出門拜師傅，逐儕乜做得出師哦！
烰菜：音poˇ coi；用油炸方式烹飪的菜餚。
錐錐：音zuiˊ zuiˊ；尖尖的，形容東西堆成錐狀。
出年假：音ngib ngienˇ ga ；表示新年的迎春活動結束，通常是指年初五。
出師：音cudˋ siiˊ；學徒向師傅學習，期滿而有成，能自己獨立作業。
