飛禽走獸
【文／羅肇錦／國立中央大學客家語文暨社會科學學系榮譽教授】
發音人：羅肇錦（四縣腔）
吾羅姓个祖先，係十二世羅栢康公飄洋過海來到臺灣銅鑼，傳到吾爸該代人開始分家，散居苗栗各地。到崖食狗屎（十九世）出世無幾多隻月，吾爸吾姆就㧡兩擔碗筷家具換洗衫褲，從三座屋行到樟樹林个竹圍仔雙峰山下落腳。搭寮挖地種菜種番薯生活，緊工時節，吾爸就同別人做事打零工過日仔。三個大細半饑半餓拖挷到大，背尾還招加兩個老弟◦一直到崖十六歲去讀新竹師範學校，正離開雙峰山个保佑，過獨立自主个生活◦無想著三年後，堵堵滿十八歲該年，崖又分縣政府教育局派到雙峰山背个新隆國小教書。這係做崖人生个第一隻頭路，第一擺賺錢，領第一份薪水。雖然一個月領無到一千箍，但係對崖來講，係上天分崖个盡大獎勵。
崖就恁樣同雙峰山結下一生人个緣分。退休轉到雙峰山背，也就係大竹圍个糞箕山搭屋種樹，過自主淨辦个日仔。共樣个雙峰山共名个竹圍仔，共種無共陣个飛禽走獸。這兜飛禽走獸對崖來講，五十年間有盡多無共樣个面目。
五十年前，前山个鷂婆衝啊下來就想愛挾雞子，雞嫲咯咯滾，奮命仔同鷂婆相打；一下後山个鷂婆飛到半天高，噍噍滾尋無雞仔好捉，也看毋著雞嫲鷂婆相打，顛倒鷂婆閕翼浮雲遊走个身影，強強愛餳走崖看鷂婆个魂魄。前山个白鶴仔原旦一群群仔相賽在綠竹園做竇，歸排仔身白白腳長長，像全村白鶴選毋出村長，吱吱唼唼，吵日吵夜；今晡日後山个白鶴仔會先企在樹頂，遠遠看著犁田割禾，就相招相報，歸陣歸陣仔飛到田肚，身白白腳長長，像歸坵就係蟲仔等佢等來搶食樣仔◦共樣飛高高个雕仔，時代無共樣，生存个條件也改變咧◦人个生活乜共樣，五十年前个生活就係生存个打拚，毋敢去想品質个問題；這下人係追求个係生活个品質，毋使透日仔為生存去煞猛到無日無夜。
五十年前家家戶戶就畜牛仔、羊仔、豬仔、狗仔、貓仔，靠這兜頭牲來做田事、捉老鼠、掌屋，老欸還做得熟肉落肚維持生存。該當然，也看毋著山羌、鰱鯉、猴仔、果狸，這兜毋會同人做事个走獸，因爭佢兜早就分人捉來做菜，食落塞毋飽个枵肚。毋過 現下个箕山就無共樣哩唷，貓仔、狗仔變寵物，打早運動牽等狗仔做伴，半晝上街揇等貓仔買菜。你遶透山路，看毋著一隻牛仔，堵毋著一隻羊仔，尞過歸村隔壁鄰舍，也尋毋著有畜豬仔个屋下，有兜細人仔輒常食豬肉嗄吂識看過豬仔。分人最想毋通个係，恁多年來个箕山，當輒看著山羌、鰱鯉、果狸、田螺狗，尤其戇趖戇趖个鰱鯉，係保育動物，大家看著就捉來放山，驚佢分狗仔咬死。無想著屋邊樹園白蟻多，鰱鯉逐啊走放入山，無幾久又走倒轉來，挖到地泥滿哪就一空一缺。
人講「十年河東，十年河西，莫笑窮人穿破衣◦」社會人情世事个變化，毋係個人能力就有辦法左右。對這位，飛禽走獸个生存淘汰，又乜共樣，有當多想毋著个變化，當多尋毋著个規則。上天落地，禽來獸去，天頂飛个，飛啊飛欸就飛走了，地下走个，走啊走欸就走忒了。崖想開天闢地个盤古，日增日變高變大，等到像天恁高該下，又乜死滅化成萬物，恁仔个天地，恁仔个萬物，又還有麼个好道嘆？
※本文的「崖」同教育部訂的「𠊎」之意。
