拿著學位以後
【文、圖／鍾榮富／南臺科技大學應用英語系講座教授】
發音人：鍾榮富（南四縣腔）
去參加畢業口試，實在講完全係臨時決定个，事先並無做盡周全个準備，無想着就恁仔考過了。頭擺讀劉紹銘个「食馬鈴薯个日仔」，講佢考過博士口試以後，歸个人忽然頭腦空白，茫茫然無記得麼个了。最終个大目標就恁樣七八十分鐘之間落腳了，歸到屋下，一時嗄毋知愛做麼个。
口試在七月中，堵好暑假，細人仔毋使上課。𠊎同屋下人匆忙決定，一路開車去南部个迪斯尼樂園，讓細人仔認識美國兒童樂園个搞法。𠊎等个行程無計畫，也無趕時間，慢慢仔行。出香檳，最先到聖路易斯个拱門(arch)，這係頭過美國人向西發展必經个位所，親像中國歷史上个陽關。所謂「西出陽關無故人」，早時去西部開墾个美國先輩，過了這個地方，一切都愛自家打理。
去六旗(six Flags)，乜係大型个兒童樂園。來到密蘇里，當然愛去看馬克吐溫出生个地方、相關个博物館、同細人講湯姆、哈克个故事。第四站去遶哥倫布市个密蘇里大學，這堵好有朋友在這讀書，𠊎等在校園附近歇了一夜。
第四日到肯塔基个石洞地區遶尞，各種趣妙个鐘乳石，有長有短，有紅有白。一洞連一洞，看起來無路相連，閃一下又看着細路。比起桂林，這个石洞又發又大，石形多種，色彩繽紛。向南過了田納西州，就來到了喬治亞，這係可口可樂个大本營，設有盡大个觀光工廠，大家都想愛入去參觀，了解可樂个製作過程。另外一個地方就係當年「亂世佳人」拍片个布景，周圍有南方古代个衫褲出租，故所路上看得到有人著等長長个白裙，縮等腰，擎等布遮仔，像歸到南北戰爭之前。
過了喬治亞，就進入佛羅里達了。這位个迪士尼樂園係細人仔夢中个理想，佢等前年去過加州个，毋過當時正三歲、一歲定定，無辦法去搞。這擺來，雖然年紀還細，已經有過多使得搞个東西了。打早入園搞到暗夜關園，看花車、看燈火，搞到盡興樂。第二日，歇入朋友在旁沙克拉沙灘(Pensacola beach)脣个屋仔，有十二間房，𠊎等屋下家人歇三間。對屋下行去沙灘，淨三分鐘定定。細人仔打早就去沙灘捉老蟹、捉鱸鰻、拈田螺，搞到歸身溼溚溚，還無想歸屋。下晝，朋友帶𠊎等坐船去遶海上風光，就讓細猴仔自家開船，轉方向盤，一路順等海水行。臨暗頭，就在海脣烤个牛排及海產。
旁沙克拉沙灘屬於南方盡有名个海灘，水淨、無湧，沙平、水溫堵好。沙灘看得到樹林，碧綠如翠。每年都有當多旅客來這度假，朋友在這附近个大學教書，邀了幾下擺，這擺正有閒來尞。𠊎等在這歇了三暗晡，正離開。
這擺遠行，開了七八个州个車仔，正歸到香檳。做得講，係離開美國最後个旅行，歸到台灣，可能又愛無閒直掣了。
