惜狗仔个老阿伯
【圖／文／鍾孝昇／桃園市中壢區龍岡國小教師】
發音人：邱新春（南四縣腔）
今年暑假，又帶等兩隻狗仔來到墾丁避暑。因爭舊年有當好歇睏个經驗，今年𠊎還係訂這間「海韻旅舍」來戴。海韻旅舍就在墾丁大灣个沙壩脣，不時做得聽着海浪激上激下个聲，一聲跈等一聲，當有韻律，這應該就係店名安到「海韻」个原因。
除忒有靚靚个海景，「海韻」乜係一間「寵物友善」个旅舍，毋單淨狗仔做得入間房睡目，店門口乜有水道水分狗仔在搞水過後，做得洗身，頭家還準備大面帕分佢兜來捽燥，實在當有心。難怪兩隻狗仔正到店門口，就當自在个行入去，就像轉自家屋下共樣，佢兜定著有感受着店頭家對動物个愛心。
經過一暗晡个歇睏，打早天一光𠊎兜就渡等狗仔去沙埔仔行尞。狗仔踐來踐去，亍上亍下，搞到歸身都係沙，故所𠊎兜就在店門口摎狗仔洗身。這時，一个老阿伯坐在店門脣个凳仔項，目晶晶仔看等𠊎兜，緊看緊笑，笑到嘴擘擘。𠊎正想着老阿伯昨暗晡乜坐在這位，該央時𠊎還話着佢乜係人客，經過顧店个細阿妹紹介，正知老阿伯原來係旅舍个老頭家。
正想開嘴問佢，老阿伯黏時就用華語摎𠊎講佢乜當惜狗仔，毋過屋下人無分佢畜，故所一看着這兩隻狗仔，佢就當歡喜，緊用手去摸佢兜，就像係自家个狗仔共樣。乜恁樣，𠊎兜這惜狗个「狗奴才」，就對畜狗仔个話題，講到老阿伯佢八十零个人生故事。
老阿伯在屏東縣內埔鄉出世、生長，係六堆客家人。高中畢業後，佢換過幾下項頭路，最尾就來到農委會畜產試驗所恆春分所，做會計个頭路，一做就係四、五十年，二十年前就在這位退休。今這下，老阿伯閒閒無事做，就在店門口掌屋，乜會𢯭手招生理。講起自家个古，原旦還恬恬个老阿伯，嗄黏時變到另外一儕人共樣，講到毋會煞。
雖然八十零歲哩，老阿伯講起話來，還係當有元氣。毋過，共樣个話，佢會翻牙倒齒講幾下擺，𠊎發現佢身體可能有兜仔無鬆爽。拿藥仔分老阿伯食个孫女同𠊎兜講，老阿伯這幾年小可有兜仔顛顛𢛔𢛔个情形，輒輒毋記得自家愛做麼个。為着愛分佢有較多機會摎人群接觸，這下逐禮拜，都有車仔接老阿伯去社區關懷據點，同「老」同學共下上課、食飯，分痴呆个症頭莫恁緊惡化。
「老阿伯你係對哪位學會計个呢？」
「𠊎在屏東个那間高中學个。」
「哪間高中學个？」
老阿伯一下仔想毋著學校个名，就定定仔在揹在背囊个書包肚揙出一本記事簿，翻啊翻，想愛查着學校个名。吂知兩下半，佢就在這本記事裡肚尋着。就恁樣，𠊎兜口涎波潑，食茶打嘴鼓。𠊎想，這本用原子筆寫到淰淰个記事簿，毋單淨見證了佢往時發生个人生大小事，還𢯭手摎自家漸漸添忘忒个記憶尋轉來，做得講係老阿伯個人个傳仔。
歲數有哩，記得个事情緊來緊少，毋記得个事情顛倒一項加等一項。在摎老阿伯打嘴鼓个時節，佢乜同𠊎兜分享厥人生智慧。佢講「人生在世，莫摎人昶計較，人對毋好个事，就摎佢豁忒，對有恩，愛記在心肝肚，恁樣人生正會暢樂。」聽到老阿伯低言細語講出佢个生活體會，分𠊎想着有一句話係恁樣講：「只有遺忘，正會幸福。」實在有影。
來載老阿伯去社區關懷據點个車來哩，車頂老阿伯个同學煞猛擛手喊佢遽遽上車，老阿伯正高不將定定仔行去坐車，緊行還緊斡頭愛尋兩隻狗仔，實在恁相惜佢兜喔。
三日兩夜个旅行結束哩，愛離開客店个朝晨，𠊎兜在門口，想愛摎老阿伯辭別，講一聲承蒙你兜个款待時。恁堵好，老阿伯正離開旅舍去「學校」上課，摎𠊎兜打宕窿哩。故所轉屋下間日，𠊎就摎老阿伯同狗仔共下翕个相片寄分佢，感謝老阿伯个同時，乜提醒佢明年暑假𠊎兜還會轉來這，聽「海韻」个聲，也愛聽老阿伯講个古。
後記：
今年暑假，帶等兩隻狗仔來到恆春半島避暑，對墾丁出發，遶尞了幾隻半島項个景點。在旅舍，堵着小可痴呆，毋過當惜狗仔个老阿伯。在旭海村，拜訪為着村肚个大人細子，付出自家个時間、金錢个人間菩薩。乜在四重溪，浸着分遊子、旅客，感受著燒暖个溫泉。最後，在保力村，這台灣盡南片个客家莊，感受著村民用心傳承客家文化个用心。
這兜地方毋單淨有靚膩膩个自然環境，還有醹醹个人情味，分𠊎試着盡感動，故所摎這擺个歷程寫成【恆春半島客遶尞】四部曲，分大家來分享，希望大家做得共下遶尞「國境之南」个恆春半島。
【恆春半島客遶尞】四部曲
一、惜狗仔个老阿伯(恆春，墾丁)
二、旭海村个人間菩薩(牡丹，旭海)
三、行過四重溪(車城，四重溪)
四、海角七號馬拉桑，琅嶠客家保力村(車城，保力)
