屎尿味緒多
【文、圖／彭欽清／國立政治大學退休教授】
發音人：彭欽清（四縣腔）
世間人百百樣，毋過，皇帝大官、乞食羅漢、有錢無錢，總係愛食愛屙。千百年來，盡多人講煮食，無麼有人講屎尿，理由盡簡單，屙糟个東西，大家避得開就盡量避。
毋過，儕儕就愛屙屎屙尿，故所無論麼个話有關屎尿个語詞都十分多，講屎个又較多，麼个道理呢？屎較臭，較難屙，也較毋好處理，分人个印象較深，自然就用較多。客話乜共樣，下背就請大家來鼻下仔客話个屎尿味緒。
人一下娘胎第一擺屙个係胎屎，續下來幾個月仔，嬰兒仔都係食飽睡，睡飽屙，哪久愛屙屎屙尿，無定著。該下仔个屎尿量少，拿尿布過尿裙仔一包就解決。嬰兒仔日見日大，屎尿量加較多，成時仔尿布尿裙仔包毋多核，暗晡頭睡目下擺仔屎尿會漬著被，第二日愛洗愛晒，當費氣。
客家婦人家，日時頭雜事就做毋會忒，實在無幾多時間來洗洗湯湯。故所嬰兒仔三、四個月仔就愛開始兜尿，兜畀慣，做阿姆儕三更半夜，除忒愛飼乳還愛兜尿，難得一覺目到天光，天吂光仔，又愛䟘床無閒。
兜屎兜尿該下，阿姆定著愛用嬰兒仔聽得識个話，兜屎該下，會聽著兩子哀共下在該嗯呀，嗯呀，看著嬰兒仔另屎另到面紅濟炸，做阿姆儕也細氣敨大氣，正經係母子連心。兜尿雖然較簡單，大體仔噓兩下就屙出來，毋過，下擺仔噓當久，腳都痺忒吔，嬰兒仔就係毋屙。
在這站仔，做阿姆儕盡注意嬰兒仔屙麼个屎。經過千百年个心口相傳，婦人家多少仔對嬰兒仔屙麼个色、麼个型个屎看得出嬰兒仔健無。做阿姆儕盡愛看著嬰兒仔屙淰黃个屎，這表示細人仔無病無痛。吾姆還在該下，逐擺看著孫仔孫女屙這種屎就會講：「吾細孫仔屙个屎還靚哦！」人見人惱个屎竟然做得用「靚」來形容，怕淨做阿姆阿婆儕正看得出。屙青屎就係講嬰有著驚著，屙硬屎抑羊仔屎定著係火氣大。係講屙痢肚屙毋會煞，就愛煞煞帶去分先生看，無斯，拖久吔會變到慢皮風屙臭風屎，該就大勢吔。
兜屎兜尿慣了，細人仔有時還係會拉屎拉尿。還細時節拉屎拉尿大人還會原諒，較大時還毋會忍，就會分人打。漸漸仔，細人仔愛會用屎缸無就尿桶。糞缸大部分連豬欄，又深又臭，係講撞著缸伯姆，歸身仔會癢，愛燒摒屎棍來熏熏啊正會好，細人仔講著愛去屎缸下屙屎，都畏到會死。尿桶放在間角，又暗又濕氣大，已臭。
屎尿臭罔臭，毋過係一等好種菜肥料。原在莊下耕田人，翻耕仔禾割忒、田犁好，會分兜仔分無田地个鄰舍種芥菜、蘿蔔仔、荷蘭豆、結頭菜這兜，總下盡食肥，自家屋下个人屎人尿，豬屎尿、雞屎、鴨屎、鵝屎加加起來，還毋罅用，就愛熰糞堆篩火𤊶泥。
該下仔人，逐家都會在屋脣屋角，抑係附近仔尋一角仔挖隻細窟仔做糞堆，好倒垃圾，到了冬下頭好燒來做肥種菜。
係講恁仔肥還毋罅，該就愛去街項開店人家㧡肥，有時還愛有交情正㧡得著人家个屎尿。聽講有兜人還對㧡厥糞个人講：「你愛承蒙𠊎喲，吾屋下食較好，糞較肥，菜較會大唷。」
㧡人个糞還愛看人个面色，當多人就去學校這兜公家機關去㧡，㧡个人多，大家就相賽早䟘，吾姆八十歲邊仔有一擺同𠊎講起這兜老狗屎，佢笑笑仔講：「寒天還天普普仔，無麼个落霜天，打赤腳，㧡等裝到會哱出來个尿桶，行愛遽又愛遽，暗摸叮咚，輒輒險險同人相撞仔哦。」
𠊎看等吾姆，腦屎肚緊顯出老哀仔準笑科講个畫面，想噭。
