領獎个滋味
【文、圖／黃美貞／台北市光復國小教師】
發音人：黃美貞（四縣腔）
逐擺看着同學上臺領獎狀，心肝肚就試著當欣羨，毋知哪央時正會輪着𠊎。阿姆講：「戲棚下企久就係吾个，總愛肯拚，定著會有機會。」
有一日，先生拿一張頒獎通知單分𠊎，原來係上隻月參加客語朗讀比賽，得著四年生个第二名。通知單頂高還有集合个時間同所在、愛著麼个衫正適當，𠊎遽遽摎這張單仔摺到細細仔，放到書包仔盡頭前該格，這係𠊎第一擺得獎，轉屋下一定愛照鏡仔好好啊練習。
轉到屋下，𠊎黏時同阿姆講這隻好消息，阿姆看著通知單，就講：「若學校个先生當認真，領獎个資訊寫到恁清楚，連第幾排第幾個就寫到真真，一定花當多時間來準備。」有影，學校每擺領獎就有兩百零儕，輒常看著先生在辦公室發單仔，訓練六年生个大哥大姐擎牌仔、念稿仔合放音樂，雖然𠊎上臺正兩分鐘定定，但係後背斯愛花盡多个時間來計劃。
領獎該日，𠊎七早八早就䟘床，著等頭暗晡用熨斗，熨到亮線亮線个學生衫，食飽朝背等書包仔就去讀書了。一到教室，細心細意拿出該張通知單，行到集合个位所，有成十儕在該等便了。背等紅帶仔，面頂繡等頒獎大使个大哥大姐，喊大家恬恬毋好講話，看牌仔去排隊，看起來當風神，𠊎尋著自家个牌仔，就企到該位等到人齊。
等著校長到臺頂就開始頒獎，𠊎跈等頒獎大使上臺，對好地泥个記號企正，聽口令對校長行禮，同校長講恁仔細，看著臺下當多人，手巴掌个汗緊來緊多，就緊搓學生褲，實在還敗勢。每儕領著獎狀過後，還愛拿等獎狀共下翕一張相做紀念，雖然爺哀無法度來現場看𠊎領獎，毋過還係做得看相片。
轉著屋下，阿姆講：「你領獎个相片當得人惜！」原來先生下晝就將相片傳分家長。雖然領獎个時間一下仔就過忒了，但係歸日仔个心情就特別暢，毋單淨領獎盡光榮，還愛記得感謝𢯭手頒獎个先生同大哥大姐，有佢兜个煞猛，正有恁好个回憶。
戲棚：hi pangˇ；背後搭製布景供演員表演的舞臺。
亮線：lang xien；整齊、光亮美麗。
輒常：jiab songˇ；經常、常常。
