晴耕雨讀小書院
【文、圖／薛常威／國立中央大學客家語文暨社會科學學系在職專班碩士】
發音人：薛常威（四縣腔）
在桃園龍潭个田中央，有一間當有特色个書店「晴耕雨讀小書院」。晴耕雨讀，係講晴天个時節做事，雨天就讀書个意思，這係順等自然个生活節奏，也係書店个經營理念，在這價值混亂个時代，希望大家做得用心工作，好好生活，用自家个步調，實踐心中个美好生活。
有人講「耕讀傳家」係客家人个傳統精神，庄下乜有老屋个堂號就係「耕讀傳家」。耕田做得生產五穀，賺錢落食。讀書做得知詩書，達禮義，學著做人个道理，還做得考取功名。
晴耕雨讀小書院毋單淨係一間獨立書店，這位也有賣咖啡摎餐點。書店外背就係當靚个農田摎花園，在這位做得點一杯咖啡，拿一本二手書來看，非常舒適。花園乜做得分細人搞，非常適合大人細子共下來這位尞。店內用學校个凳桌來做食飯个所在，摎大片个書櫥融合在共下。
無定期乜有舉辦各樣課程、研討會摎新書分享會，最新个消息在面書頂背會公告，有閒就做得報名參加。
歡迎大家來龍潭尞个時間，做得在這位，看一本書，啉一杯咖啡，非常个享受。
