八德官路缺袁屋饒平客特色
【文、圖／徐貴榮／國立中央大學客家語文暨社會科學學系兼任助理教授】
發音人：徐貴榮（四縣腔）
饒平客家係台灣客家主要个族群之一，清朝手仔在廣東省潮州府饒平縣个元歌都，這下个饒平縣上饒地區來臺灣，總人口係臺灣客家个第三位。毋過到這下還會講饒平客話个伸着在桃、竹、苗這兜縣市項，差毋多全係中老年紀个老人家，其他在台北、中南部个總下變「福老客」，人講个「客底」哩！
位在桃園市八德區官路缺个袁姓，就係恁多饒平客家个其中之一。袁姓14世祖秉正守備公，從原鄉元歌都嶺腳鄉嶺腳社冒險過烏水溝來台灣。淡水上陸過後，初下碼來到鶯歌个橋仔頭庄，煞猛打拚，經過艱辛萬苦，開發着四甲零田。到第三代16世振綱拔力公同嘉勤正直公，在道光30（1850）年左右仔，徙到官路缺這搭仔來，耕五百零甲田，就在這重起祠堂，安到「德慶堂」（圖1）。
圖1 袁屋「德慶堂」吂改建之前个舊祠堂建築
（袁芳湧先生提供，翻拍：2005.5.30）
這下个「德慶堂」係民國75（1986）年10月新起完成个（圖2），位所在中壢愛去大溪个方向。過忒龍岡圓環、忠貞國小、十字路口過忒，大約幾十公尺，左片有一條細路仔下去就到咧！祠堂左片有祖墳「袁氏佳城」，碑石頂高刻等「饒邑」字樣，表示原鄉係從饒平來个。（圖3）
圖2 民國75（1986）年10月新起完成个德慶堂（2005.5.30攝）
（袁芳湧先生提供，翻拍：2005.5.30）
圖3 在德慶堂右片脣个祖塔，碑石中央頂背頂刻等「饒邑」兩字。（2005.5.30攝）
（袁芳湧先生提供，翻拍：2005.5.30）
聽講袁姓本來个五百零甲田地，觀音有兩百零甲，在日本時代个大正9年左右，毋知仰般分宗親賣忒吔！光復過後，伸着个公田經過「放領」，又過經過分家，這下宗祠管理个公田伸着八分零。在74年成立「袁汝成祭祀公業管理委員會」改建宗祠，管理宗祠，管理伸着个公田，定舊曆2月2「掛紙」。
官路缺這隻所在，在八德區霄裡偎平鎮个忠貞、社仔地區，早期居民差毋多係講客，主要係講四縣，還有少部分講海陸、學老。這幾十年來，因為工商發達，外來人口當多，又兼忠貞營區，當多人講學老話抑係國語哩！官路缺袁姓人還會講饒平个伸無盡多，大部分就係五、六十歲以上个中老年人，後生仔毋會講，甚至聽毋識客。
圖4 廣東省饒平縣上饒鎮康東嶺腳村眺望，翻過山就係福建省平和、詔安縣合界。
怕係袁姓饒平話个原鄉在上饒鎮个嶺腳仔，盤過一座山就到福建个平和、詔安縣吔！（圖4）故所有一般饒平客話个語音，又還帶有當多詔安客話个特色。除忒陰平、陽平、上聲、去聲這四隻聲調同詔安共樣以外，盡特殊个係「陰入」个「舌根音」同詔安共樣無入聲，變到另外一隻新个聲調，安佢「超陰入」。比論講：「腳」講gioˊ、「角」講goˊ、「屋」講vuˊ、「額」講ngiaˊ、「壁」講biaˊ」、「遽」講giaˊ、「目」講muˊ…這兜；連讀變調也同詔安共樣，比論講：「腳目」講gio muˊ、「隔壁」講ga biaˊ、「額頭」講ngia teuˋ「目珠」講mu zuˇ、「腳跡」講gio ziaˊ。另外就係當多字無「i」介音，像姓袁个「袁」講venˋ、桃園个「園」講venˋ、當遠个「遠」講ven^、出血个「血」講fedˋ、打鐵个「鐵」講tedˋ、「耕田」个「田」講tenˋ、「花蓮」个「蓮」講lenˋ…這兜。
還有當多个詞彙講法也異特殊，比論講：「肚屎」講「屎肚」、「毛欄」講「簝蕪」、「門檻」講「戶□（canˇ）」、「耳公」講「耳窟」、「鼻公」講「鼻窟」、「痛」講「疾」、「講話」講「講事」…這兜，使得當多客家人聽毋識饒平客話。
官路缺个饒平客話係講消失忒去，毋單止係客話个損失，也係語言界个損失啊！
（本文个完成，愛承蒙袁芳湧、袁明環先生个協助、訪談、提供族譜、資料）
※本文的「着」，同教育部訂的「著」之意。
