養子愛教 養老愛孝
【圖／廖千慧；文／何石松】
發音人：何石松（海陸腔）
「養子愛教，養老愛孝。」意思係講養育細人仔，一定愛教佢兜做人做事介道理，這道理就係對爺哀愛有孝，知上知下；共樣介，自家服侍老人家，也愛做著孝順，好好分爺哀安養天年。恁樣形，就係所謂介「遺子千金，毋當教子一經。」這一經，就係做人介基本原則，愛做成人，對社會有用介人，也就係「爺哀慶，毋當子女慶；爺哀出頭，毋當子女出頭。」
愛希望子女出頭，該一定從細斯愛好好教育。教育介第一步，就係愛教佢讀書。所謂「養子毋讀書，斯像畜條豬」，這位介讀書，係講生活上介道理，人摎人之間介關係來講，毋係書本上介知識定定，毋好講「四書讀透透，毋知芋仔摎黃豆。」該種教育，係無成功介，像該分佢留學，繳佢讀書，讀到碩士，倒轉來嗄㓾爺哀；讀到博士，嗄摎爺哀掉忒，這係仰般分人心冷啊！
這就係人心，人心不同，各如其面；龍生九子，子子不同。自家降介也共樣，所謂「降子身，無降子心。」心無共樣，愛分佢正，所以正愛教育。養子毋單愛教，還愛早兜仔教。人講：「竹愛嫩時拗，子愛幼時教。」從細就教佢正確介觀念，培養佢好介習慣，也毋使講恁多道理，多多講兜古分佢聽。張大春講：「教育，愛從講古開始。」所謂「初一十五毋講古，三頭兩日背了祖。」可見，講古對教育介重要。
從細聽兜忠孝節義介古，心肝肚斯有該正確介觀念，了解著「竹有上下節，人有長幼分」，行向正道介思想，行為就毋會偏差，該入門正咧，志向就會高，愛做有道德介人。比論講，從細貧苦介范丹，知得人介艱苦，處處替人設想，幫助別人，佢講過一句當有名介話，就係「但願天下人人富，毋怕范丹一人窮。」摎「石崇豪富蓋天下，毋當范丹一扇帡」共樣，表示了「積財不如積德」啊！道德高尚，教育就成功咧。
宋朝文學家蘇東坡，細細時節，厥姆教佢讀書，也摎佢講范滂忠義介故事，蘇東坡受佢影響儘大，後來也當有成就。所以講：養子愛教。使著蘇東坡毋單學問好，品德好，就係從細就有故事裡肚，該兜有才德介人，深深影響著佢，用這來做模範，就係最好介教育。佢在《范文正公集》介序文講，佢八歲就非常敬佩范仲淹，47年來無辦法向佢學習，係人生最大介遺憾。范仲淹介成就，大家都知，最重要介係，佢身上有非常多客家文化介內涵，深深影響著一代又一代，一直到這下，大部分范屋人介廳下，都有掛等范仲淹介遺像，也係一種無形介境教啊！難怪關西范朝燈十子十登科，發揮范仲淹介精神，受著大家安腦。
養子用講古來教育，可以培養當深介親子感情，到大咧自然就會想著爺哀，用孝順來有孝爺哀。毋好講爺哀介偉大，就係該歸身積惡介目連厥姆，佢還係上天落地，舂上跌落介去救佢，雖然遇著當多困難，佢還係甘願自家受苦，這正經係天下第一孝子啊！共樣，該范仲淹，蘇東坡等，全部係非常有孝自家介爺哀，係當好介模範。
聽講，唐朝介崔儋，厥婆當有孝厥太。厥太80零歲，牙齒㪐淨淨，無辦法食飯，厥婆逐日服侍厥太梳妝洗面，然後用佢介乳分厥太食，使著厥太安養天年，一家幸福。一日，厥太對歸屋下人講：「𠊎無辦法報答𠊎心臼介恩惠，不過，你兜一定愛像佢對𠊎恁有孝，來有孝佢正好。」有人就講，有德介人後代一定昌盛，這就係所謂介「乳姑流芳」。在這恁好介境教之下，崔儋本人，也當有孝，同時，也當重視教育子女。
愛子女出頭，又愛佢兜賢孝，本身斯愛先有孝老爺老哀，這正係教子一經介道理。所以講：養子愛教，養老愛孝。
※本文的「介」為大眾通用的「的」，同教育部訂的「个」之意。
