行過四重溪
【文、圖／鍾孝昇／桃園市中壢區龍岡國小教師】
發音人：邱新春（四縣腔）
離開旭海村，順等199號縣道，𠊎兜愛前往另外一隻盡有名个溫泉區──四重溪溫泉。這條頭尾都係溫泉村个199號縣道，彎彎斡斡穿過个，就係台灣本島盡南片个山地鄉──牡丹鄉，這位乜係頭擺讀書時節，讀到个「牡丹社事件」發生个地方。雖然「牡丹社事件」既經一百五十零年，毋過在大路脣，還做得看着「石門古戰場」个園區，用來紀念這段台灣人抗日个歷史。
通過「石門古戰場」所在个窩壢，就愛離開牡丹，來到車城鄉了。差毋多幾分鐘个車程，位在四重溪畔个四重溪溫泉就到了。
四重溪溫泉係台灣盡有名个溫泉區，這位因爭有天然溫泉對地下湧出，頭擺就有「出湯」个稱呼。聽講清朝沈葆禎巡台該央時，官員愛涉過溪水四擺，正做得到這位，故所摎這位安到「四重溪」。日本時代，經過發展以後，嗄變到遊客烏麻攢濟个溫泉區，還摎陽明山、北投、關仔嶺，共下安到「台灣四大溫泉」。
這幾年，屏東縣政府異用心來規劃，毋單淨修整了溫泉公園，變到有日本風情个主題公園，還逐年舉辦觀光溫泉季个活動，摎這隻本來漸漸會末忒个溫泉區，做著有聲有色，盡鬧棚哦。
來到溫泉區个中央，行入溫泉公園，看得着滿山滿屻榮榮个樹仔做得遮蔭，還有毋使錢个泡腳池，分大自家自由來使用。跈等步道慢慢仔蹶，就係揚蝶仔山壢，在這位歸路都有揚蝶仔滿奈仔飛，當生趣哦。崠頂个溫泉神社，供奉著藥師佛，遊客做得用溫泉水摎藥師佛來洗浴，聽講恁樣做著得到佛祖个庇佑。
四重溪溫泉公園个溫泉神社，供奉藥師佛，遊客做得用溫泉水摎藥師佛來洗浴。
這擺愛來墾丁之前，老屋就在四重溪脣个「大梅社區」𠊎个學生仔「巧克力」，就摎𠊎講來到這位，有一隻公共洗身間，做得洗溫泉。這隻囥在公園壁角个公共洗身間，毋單淨環境當淨俐，厥溫泉水乜異清異燒，洗起來分人試著當鬆爽。聽講這種「碳酸氫鈉溫泉」對人體血液循環、放鬆筋骨還當有幫助。難怪有異多在地人，都會摎這當作係自家屋下个洗身間，逐日來這報到。
溫泉洗好了，嗄下來就愛去「巧克力」厥老屋「大梅社區」。
四重溪溫泉區後背个「大梅社區」，係一隻原住民排灣族个莊頭，乜係牡丹鄉盡偎平地个莊頭。雖然講這位係鄉內耕地條件最好个位所，毋過因為人口老化，加上外移嚴重，今這下莊頭伸毋幾多人來戴。像「巧克力」厥親戚大部分都搬出來，過年過節正有轉到這位。
車仔駛入莊頭个細巷仔，兩片都係一兩棧細細間个屋仔，看無麼个人，環境當清幽。包尾就在這乜細細間个「大梅教會」頭前，尋着「巧克力」厥老屋。老屋無異大，簡單簡單用紅毛泥、鐵皮搭起來个屋舍，毋過拚掃著當淨俐，完全看毋出當久無人戴个樣仔。𠊎兜就在屋舍前翕幾張个相片，用手機仔傳分佢看。
「大梅教會」頭前，尋着學生仔「巧克力」厥老屋。
無想著「巧克力」厥姆看着屋仔个相片，嗄當歡喜，乜當感心。佢講屋下人當久無轉了，屋仔長年透天都無人整理，這下看着屋仔還好好，無分人搣壞忒，本旦還吊掛个心，乜毋使愁了。
這擺𢯭手「巡田水」个旅行，就在「巧克力」厥姆个感謝聲中來結束。
聽過一个輒常旅行个朋友恁樣講：「生份个地方無感情，毋過當生趣；熟識个地方無風景，毋過當有情。」這句話當有意思哦。共樣个屋仔，𠊎兜外地人，看起來試著都當生趣，毋過對識戴過這間屋仔个人來講，定著有特別个感情。
百過年前个老古人涉過四重溪，發現了這坑壢肚个溫泉，今這下遊客乜涉過四重溪，來到這隻溫泉區洗身、遶尞，享受到這隻帶分人燒暖个溫泉。有句諺語講：「前人種樹後人涼，前人種花後人香」，這道理，實在有影哦。
戴在大梅社區个村民，過去為著生活，涉過四重溪，去到外鄉絡食，𠊎想佢兜發夢个時節，定著也輒輒涉過重重个溪水，轉到這起等細細間屋仔个莊頭，尋著故鄉个味緒。
行過四重溪，不管係旅客，也係遊子，乜不管你係仰般个心情，在這都有這燒燒个溫泉共下摎你做伴。
「大梅教會」頭前，尋着學生仔「巧克力」厥老屋。
