食色天地
【文／羅肇錦／國立中央大學客家語文暨社會科學學系榮譽教授】
發音人：羅肇錦（四縣腔）
有一个聖人，大家都識，佢講「食色性也。」對箕山過客个立場來看確實「食」同「色」係動物界生存延續个本質。天地萬物，愛維持生命就愛靠食食物來供給養分正毋會死忒。天地萬物，愛延續後代就愛有公有嫲兩性相合，傳種下去，正毋會絕種。故所，食係養命，色係傳種，天地動物一生个本質就恁簡單，食色定定。食色个滿足愛靠頭尾兩隻空。以人來講，頭隻空係嘴，負責食東西講話傳信息。尾隻空係膣膦，負責鑿空鬥榫傳精傳情。其他禽獸，頭隻空也係嘴，負責食東西發聲傳信息。尾隻空係走醒紅，負責走醒傳馦傳種。
頭隻空，人个嘴會食、會講、會發聲，禽獸个嘴淨會食、會叫毋會講話。故所人會騙人講花蓼，禽獸會叫、會食，無能力騙人也毋會講花蓼。動物界不管你較聰明、較大力、走較遽个禽獸，因爭毋會講話全部就分人騙到死死。像同人盡攞得得个六畜，牛馬羊雞狗豬，逐个都分人賣來食忒還恅到人係佢盡做得信任个朋友。尤其牛仔犁田，馬仔載人載貨，應當做得同人換工正著，結果同人做牛做馬，盡背尾毋會做了，還分人㓾來食忒賣忒。狗仔同人掌屋，無就吠聲報信，打獵救人，功勞大過人，結果人分佢東西食，還愛頭頷尾著，到老弱無用了，也係分人拿來做香肉。可見禽獸毋會講話這一點，就輸人輸到悿悿。平平一張嘴，會食較平常，會講正得人畏。照恁樣看，人類个語言係非常不得了个創造，現代人對自家祖先留下來个祖宗言，定著愛像寶貝樣仔，細義誠心，盡全力來保留下去。
另一隻空，係人同禽獸共樣，用來屙尿又用來傳種，禽獸乖乖用上天創造个要求，乖乖屙尿，乖乖照規矩，嫲个走醒，公个鼻馦傳精，一犅一犅傳等下去。人就搞怪多咧，除忒傳種傳代，還做得用言語表達感情享受另一隻空个情慾，毋使走醒毋使照季節，總愛公嫲對得合，就做得贏過一般禽獸無法度達到个境界。牛仔馬仔係知佢兜輸到恁悿，定著譴到發誓，下二擺出世，無愛做牛馬咧。照恁樣講，另一隻空，也係人類用語言撩弄感情，使至色空產生當大个作用。歷史上當多大人物，就係追求色空滿足，所做出來个事蹟。可見語言同色空結合，係非常不得了个結果，任何人對自家祖先留下來个祖宗言，定著愛像寶貝樣仔細義誠心盡全力來保留下去。
無共樣个兩隻空仔，一隻食空，一隻色空。人个食空，管「食」、「講」兩件事。動物个食空淨管「食」定定。人个色空，管傳代管情慾。動物个色空淨管傳種定定。食色頭尾兩隻空，係天地動物一生个本質。人之異於禽獸者幾希？語言而已矣。
客人同禽獸差別有幾多？客話定定啦。
※本文的「崖」同教育部訂的「𠊎」之意。
