匆忙畢業踏入學術界
【文、圖／鍾榮富／南臺科技大學應用英語系講座教授】
發音人：鍾榮富（南四縣腔）
1989个暑假，天時特別熱，台灣來个留學生聚會增加，大部分都在討論畢業个安排、暑假遶尞个行程、尋工作个心得、歸台灣个計畫，話題又多又廣，故所參與聚會个人數陸續增加。𠊎交陪毋多，來往總係高師大來个兩三同學，但係吾同學人面當闊，幾乎所有个台灣同學都多少有認識，同佢等閒談，自然就做得了解當時留學生關心个話題。
該時𠊎對畢業、工作都無麼个興趣，主要係論文吂完成，前途渺渺茫茫，拿無定主意，最重要个問題係吾教育部个公費到七月底，以後个生活費愛自家籌措。𠊎先去尋教育學院个Moly Mack教授，佢係𠊎工作个老闆，逐禮拜同佢做事十點鐘，一點鐘15個元，多少添補屋下个生活費用。佢馬上答應分𠊎1/2 (一禮拜20點鐘)个獎學金(無使再付學費)，心中總算放下了大石頭，敨一下大氣。續等，有人建議𠊎去尋鄭教授，佢係吾論文指導教授，又擔任語言中心个主任，底下請有兩三十個研究生，海峽兩岸个研究生都想盡辦法去尋佢討工作機會，𠊎有政府个公費，從來毋想去增加厥麻煩。
還記得當時已經七月中，香檳个空中飄散著淺淺个秋意，天時乜提早入暗了，冷風蕭颯，人跡不多，多少有寂寞孤單个味緒了。吾个見面時間排啊在五點零，鄭教授个辦公室在地下室，門口个電火已經點著了，地下室恬恬靜靜，同平常人來人往个氣氛大不相同。開門以後，佢問𠊎有麼个問題，𠊎低聲同佢講公費補助到期了，愛先尋兜工作，正有辦法生存。佢恬恬無講半句話，低頭去拖箱肚尋資料，拿出𠊎繳分佢看个論文。差毋多有曩十分鐘恁久，佢正定定仔臥頭講，「若論文寫啊盡好，也差毋多會寫忒了。恁樣啦，你較用心兜仔，盡量在這隻月完成，𠊎來安排考試个時間。萬一，到時無辦法考試，正來安排做事个問題。」𠊎行出地下室，看到外背个燈火，歸排光燦，遠比平常時還過光生。空中个輕風陣陣，樹葉在風中窸窸窣窣，頗有晚秋个氣氛了。𠊎个心曝曝滾，半係溫暖，半係驚怕。「愛畢業了?」仰會有恁突然、恁毋愐著个事情呢?
同鄉个朋友教𠊎愛先申請工作，做畢業个準備。臨時著急，看了相關資料，原來尋工作个黃金時間已經過忒了。都七月了，奈還有機會呢？臨時寄出三封申請信，心中打算先口試，毋使尋工作，還係先留啊在伊大，過清閒个日仔。無愐着，兩日後，堵好高師大个先生來電問𠊎讀書个進度。𠊎同佢講愛畢業了。「該就歸來高師大，這成立研究所，需要語言學人才。」再過無幾日，𠊎接着兩封邀請面談个信仔，還係有機會留啊在美國。
又過無幾久，台灣个先生再來電，講「聘書已經寫好，宿舍也申請好了，人歸來就好。」就恁樣，𠊎無去美國个大學面談，直接歸來台灣，一路踏入客語个研究。如今，回想這一切，毋知愛歡喜抑係憂傷。人生總係有蓋多選擇，每一个選擇都無辦法回頭。
