預備軍官一年記
【文、圖／彭欽清／國立政治大學退休教授】
發音人：彭欽清（四縣腔）
民國五十五年政府个預官訓練制度改變，大學三年生个細倈仔七、八兩隻月去成功嶺基本訓練，九過十月專科訓練，無寒假，細妹仔尞到無結無煞。
𠊎抽着个係/步兵科，一下成功嶺尞幾日仔，就去鳳山步兵學校報到，該央時，流行一句話講：成功嶺係寶，步兵學校係草。自家試啊仔，正知毋會差。
大學一畢業，先去台中个竹子坑第四訓練中心/受訓一個月，跈等就去脣項个坪林第三訓練中心做少尉排長。該下个成功嶺，收大專生，陸海空三軍院校个新生，在學校受訓，其他軍事院校个新生做下在車壟埔、坪林、竹子坑三個訓練練中心訓練。
這兜新生大體係高中、高職畢業个，多少仔係空軍通訊抑係機械學校个畢業生，吾這排有愛讀國防醫學院、中正理工學院、政工幹校个，大體仔都已乖， 毋過乜有無麼聽話个，尤其本旦就係讀軍校个。
吾連長姓董，上尉，係歸中心仔盡嚴个。四個排長，第一排个係陸軍官校个，第二、三排个係陸官專修班个，𠊎係第四排，堵好一儕值星兩禮拜，輔導長係政工幹校个，五個總下係後生仔。上頭規定，排長兩日愛喊得出排項逐個兵仔个名仔，十日愛記得全連个兵仔。
八隻禮拜个訓練，科目排到淰淰，日仔過來當緊張，最尾總算順序結束。一煞，第一、第二排个排長過輔導長轉去佢這兜原來个單位，連項个幹部尞一禮拜，跈等就接新兵。
吾這連實際淨有三個排長，第二排个生來矮頓矮頓仔，好賭，第三排个好酒，兩個都係專修班个，輔導長五十大零吔，營務官（管財務、補給）好賭好嫖，連長驚佢出問題，拜託𠊎代營務官，故所𠊎逐個月有一日愛去台中市區肚个收支組領月給，幾下擺轉啊來就愛揹起值星帶，帶歸連个人去拷白仔。
一星期一暗晡又愛在軍官團教英文兩點鐘，中心指揮官顏少將有時會來巡課，無準備會出醜。有一擺，板橋个運輸學校愛調𠊎去做英文教官，指揮官毋肯放人，換過人去。
新兵一梯次訓練兩個月，有一梯次係高雄美濃地區个，新兵一報到，𠊎巡佢這兜整理內務該下，發現吾這排有一個姓宋个歸身仔刺龍刺鳳，輔導長講佢有案底，喊𠊎愛注意佢。
照規定，新兵入伍頭隻禮拜日無好尞，這姓宋个報到第二日／就同𠊎講，屋下有已急个事情，愛等佢轉去處理，做得分佢轉去無？𠊎問連項老班長个意見，佢講照厥經驗，這種人你對佢好三分，佢會對你好七分。𠊎就去同輔導長過連長參詳，保證講佢會準時轉來。拜六臨暗仔就放佢轉，拜日臨暗仔佢就轉來。
佢緊承蒙𠊎，𠊎喊佢好好仔做忒兵拚自家个事業。受訓期間佢盡聽話，還會勸較毋聽管捉个兵仔。逐擺𠊎值星，一喊口令， 係有人還講話，佢就會提醒佢這兜較差毋多啊。
這梯次一煞就堵着高級裝備檢查，𠊎係代營務官，負責補給裝備，清點、整理這兜事，做下愛幹部自家來。𠊎帶等幾個班長過補給士搣歸禮拜仔，發現少幾領仔毯仔，幾隻水壺仔、幾條仔S腰帶過幾樣仔細項下个東西，班長講較值錢个怕係分營務官拿去賣忒了。
連長講毯仔佢去其他連借，其他个喊𠊎去臺中市專門賣二手軍用品个賊仔市場買，就恁仔，有驚無險个高裝檢查正做得過詐，一個月過後𠊎就退伍。
一年个預官生活，𠊎學著盡多，三教九流个人就接觸得著，做得講係進入社會大學前最好个職前訓練。
