文化資產之美：客庄八本簿
【文、圖／賴文英／國立中央大學客家語文暨社會科學學系兼任副教授】
發音人：賴文英（四縣腔）
八本簿係一種有關水利个宗教信仰，係全臺灣最大無固定廟宇輪值祭拜个一種祭祀圈，分布在三七圳周邊个楊梅、新屋地區，地區分做八隻領域，逐隻領域各有一本簿仔，記載等人丁摎丁口錢，合起來就有八本簿仔，逐年在舊曆八月十號邊仔，由輪著个庄頭，連等兩日輪值祭拜，還過請戲班仔做戲。
清朝有曾坤茂揹等三界爺（三官大帝）來臺。該央時，桃園大圳還吂有，曾茂公就在楊梅、新屋引社仔溪个水，挖一條圳仔，圳脣个村庄，開墾耕田就有水資源做得用。因為社仔溪溪北得水三分，溪南得水七分，故所圳仔就安到三七圳。
曾茂公無子嗣，後來个人為著紀念佢，想愛摎佢起一隻廟來祭拜，結果跌無聖筊，大家就肧想講，可能曾先公好巡田水，無想愛固定在一隻位所，故所村民就想著用輪值个方式來祭拜。除忒祭拜曾先公，還有祭拜三界爺。
有一種講法，因爭曾先公好食紅粄，佢又無後代，故所在這八年之內，屋下有新丁个，就愛打一大盤新丁粄，疊到錐錐，最頂高還會插一枝柏樹，表示長壽。
八本簿係一種客庄文化个宗教祭典，算係無形个文化資產。隨等社會、時代个變遷，希望，輪值个方式做得有彈性小可仔个變化，但係文化歷史个意義，千萬愛摎佢保留、保護、維護，還過摎好个精神文化傳承下去。
[圖14.3]經生態工法整治个三七圳新屋段
[圖14.4]三界爺(主祀)同曾茂公(左下)
