旭海村个人間菩薩
【文、圖／鍾孝昇／桃園市中壢區龍岡國小教師】
發音人：邱新春老師（四縣腔）
在旅舍歇睏一暗晡後，這擺來墾丁避暑盡重要个計畫，就愛開始哩！𠊎愛去个位所，毋係人尖人个南灣沙埔，乜毋係「國境之南」个鵝鑾鼻燈塔，顛到係台灣唯一，無公路經過个海岸脣，這隻台灣盡偏僻个莊頭──「旭海村」。
係講著「旭海」，大自家想着个，應該就係盡有名个「阿塱壹古道」。確實，這條連接台東縣南田村摎屏東縣旭海村个古道，因為有豐富个動植物資源，摎原始自然个海岸景觀，逐年都餳著幾下萬人報名，來行這條古道。旭海就係大部分人來行阿塱壹古道个頭站。
行在山海之間个阿塱壹古道
這隻戴等原住民、學老人、客家人个細莊頭，雖然有當多个觀光客來到這，毋過並無帶來較好个收入。顛倒因為無麼个食頭路个機會，後生人都出去外鄉絡食，這下，莊頭單淨伸老人家同細人仔，生活過到異艱苦，經濟上係弱勢族群。
天無絕人之路，在這只有三百零儕戴个莊頭，有兩位人間菩薩，為著村肚个大人細子，付出自家个時間、金錢同健康，分這隻旮旯角得着淰淰个幸福。來這位，𢯭手兩位人間菩薩行善，就係𠊎這擺䟓工去旭海个原因。
因為南迴公路个修整後，路較好行，這下大部分人都會對南迴公路壽卡派出所斡右手片，行縣道199線去到旭海。毋過，因為𠊎係從墾丁上北去旭海，故所𠊎先對台26線，經過港口、滿州，再過順等縣道200線，經過九棚基地後，正做得行到旭海。雖然一路彎彎斡斡，坐到屎朏都會歪忒，毋過一想着等下仔做得看着兩位人間菩薩，心肝肚試著當有價值。
經過兩點鐘个路程，總算來到旭海村个旭海小學堂。正行入去，就看着成立小學堂个「潘姐」。
潘姐全名係潘儀芳，佢係旭海本地人，本旦在中科院食頭路，厥頭家乜係中科院个醫生。因爭看着家鄉恁多細孲仔放學後，屋下無人來渡，故所就來創辦這間像「安親班」，毋過毋使收學費个小學堂。
潘姐就像阿姆共樣，毋單淨愛煮三餐分細人仔食，還愛教佢兜寫功課、簽聯絡簿。為著小學堂逐隻月个所費，她賣忒兩棟屋仔，辭忒公家个頭路，還摎老公愛換車仔个錢都拿來用，二十零年來毋識斷忒，既經畜大了五十零个細人仔。
這幾年，小學堂除忒照顧細人仔，還愛服務莊仔肚个長者，送飯分孤栖个老人家食，𢯭手處理居家醫療、喪葬補助這兜，做得講莊仔肚大大小小个事情，都愛喊潘姐來𢯭手。今這下「小學堂」个名，順勢改做「老幼服務站」。
旭海小學堂个名，順勢改做「老幼服務站」
在車頂搬出四箱个尿布，看起來親切又小可仔驚見笑个潘姐，遽遽就摎箱仔接下來，緊扐等箱仔，緊摎𠊎兜表達佢个感謝。聽着潘姐恁樣講，顛倒係𠊎，正拿恁多仔東西定定，就愛勞煩佢等𠊎歸下晝，試着當歹勢。毋過，就像看着大明星共樣，愛離開前，𠊎還係請潘姐摎𠊎共下翕相，留一張𠊎乜有幫襯做好事个記錄。
潘姐摎𠊎共下翕相，留一張𠊎乜有幫襯做好事个記錄。
離開小學堂，續等𠊎兜來到阿塱壹古道个起點，一間名安到「良心商店」个雜貨店。毋知个人，看著佢个店面，定著會驚著，因為良心商店陋陋肖肖，單淨有一隻冰箱摎一隻塑膠䇶仔定定，無掌店个頭家，乜無任何个服務，愛食麼个，愛找幾多錢，全部自家來，故所安到「良心商店」。
打白講，「良心商店」係有頭家个，頭家就係「維士比」阿伯--林春浦先生。因為阿伯逐日朝晨愛開廂型車，載村民去恆春街項辦事，這一來一往，就愛一晝邊个時間，故所「良心商店」就恁樣，用自家服務自家个方式營業。
從電視个報導知著，維士比阿伯今年既經八十五歲，三十零年來，駛壞忒三台車，長間接送這位个老人家，來往各地看病、買東西。不時還愛摎佢兜納電費、水費，去郵局領錢，因為恁樣，阿伯還摎當多村民貯金簿个密碼背下來，實在當生趣哦。
阿伯个歲數緊來緊大，身體乜一年毋當一年。聽潘姐講，細人仔接佢轉彰化老屋共下歇。這下，駛車仔接送村民个服務，乜由政府來接手了。看等這無店頭家顧店个「良心商店」，雖然感覺略略仔遺憾，毋過，𠊎還係做得感受着老阿伯為著村民付出个心血。
回程時節，行在199縣道項，雖然因為礫礫矻矻个山路，舞到𠊎搖頭拂腦，強強會嘔出來了，毋過做得摎東西同有需要个人共下來分享，𠊎試著這係𠊎這擺个旅行，最暢、最有意義个活動。
在山林壁角个旭海小學堂，有分大人細子安心个家庭溫暖；在阿塱壹古道个良心商店，乜有老阿伯無計較本錢个熱心服務。旭海，這隻在恆春半島項，細細仔个莊頭，兩位人間菩薩，佢兜用愛心，摎台灣盡尾一段無公路个海岸連起來，再過用耐心，修補這人為个必縫。旭海，毋係天邊海角，這位係人間做善事个正中心。
只有一隻冰箱摎一隻塑膠确仔定定，無掌店頭家个「良心商店」。
