水石有機書店
【文、圖／薛常威／國立中央大學客家語文暨社會科學學系在職專班碩士】
發音人：薛常威（海陸腔）
在新竹縣新埔鎮上樟路有一間「水石創意文化園區」，本來係廢棄忒个馬達工廠，鎮公所結合民間共下摎這位整理變成文創產業發展个所在，總共四百零坪个空間，有分揹包客戴个房間，有展覽空間，後場个土窯、大灶，還有一間獨立書店「水石有機書店」，係講「滴水終能穿石」，有志者事情一定會成功个意思。
「水石有機書店」係一間二手書店，這位無賣書，單淨換書定，鼓勵民眾帶書來交換，係一間免費讀書摎人文交流个空間。書店一樓提供舒適个讀書空間，歡迎大家來這坐等看書。二樓係兒童區，有塌塌米，分家長渡細人來這共下讀書。每個月還有水石噗通噗通講故事个免費活動。
園區肚還有客家料理餐廳，用新埔當地个割禾飯摎客家料理做基礎，結合社區媽媽个好手藝，事前注文，就做得食着好食个客家料理。
這位乜做得體驗古早个客家生活，親近當地个文化。比論講牛耕米碾米，早期靠人力做田事；體驗燒樵起火炒菜，也係用窯烤披薩。人客來尞一日，就做得看着新埔牛耕文化个生活。
未來，「水石創意文化園區」打算多元發展，結合各種藝文工作者，培養發展在地客家音樂、表演藝術、發展紀錄片文化工作坊，希望還較多个文創工作者進駐園區，帶動整體新埔个發展，分後生人返鄉、在地共好。
