桃園平鎮三官信仰个特色
【文、圖／徐貴榮／國立中央大學客家語文暨社會科學學系兼任助理教授】
發音人：徐貴榮（四縣腔）
在客家个主要信仰裡背，當多人都認為係三山國王、義民爺，其實還有人講「三界爺」个三官大帝。因為佢係歸隻漢族个共同信仰，又同恩俚个生活密切，盡貼近恩俚个日常生活，故所大家都無特別去講佢。
仰仔講呢？三官大帝係天官、地官、水官，考查人間善惡，眾生禍福，掌管天、地、水三界，故所又安到「三界爺」。上元天官賜福，中元地官赦罪，下元水官解厄，在道教肚个神格當高。因爭客家人耕種較多，天地水三樣非常重要，故所三官大帝受着客家人特別个重視。客家民間信仰當中，在祠堂抑係傳統民居「伙房屋」面前个圍牆項，都會留一隻凹空落去，安等「天官賜福神位」。（圖1）
圖1 圍牆設置「天官賜福神位」
（2005.6攝於苗栗縣銅鑼往通霄路脣李屋祠堂
在莊頭項，逐年正月半上元天官生，會在廟項舉辦「許福」法會，祈願風調雨順，闔境平安；七月半地官生，會舉辦「赦罪普渡」法會，祈求赦罪消災；十月半下元水官生，評筊選下年度爐主，舉辦解厄法會，祈求解厄消難。大體到年底十二月半前，盛大舉辦還福，當多莊頭會做「收冬戲」還神謝福，這係客家庄一年一度个地方大鬧熱。係講過去一年有降倈仔个，還愛在「天官生」抑係「水官生」時節「打新丁」（打新丁粄）感謝神恩，拿粄仔同莊民分享。
全臺灣主神係三官大帝个宮廟，在日本時代統計有81間，打淨桃園就有22間，新竹17間，苗栗4間，總下呿忒一半較加。從宮廟个位所來看，差毋多就係在這下个客家庄。三官信仰早期係「有爐無廟」个三官爐奉祀，逐年固定時間評筊選爐主，三官爐跈等到爐主屋下服祀，到人口增多抑係經濟較好正起廟。到這下來，桃園有27間主祀三官大帝个廟，做得講係桃園客家庄个「庄頭廟」。故所桃園客家庄同別位較無共樣个特色毋係做「收冬戲」，係在8月初2到16之間做平安戲、打新丁，評筊選爐主。還有兜庄頭个伯公廟，也會在期間內請來三官大帝慶祝，共賞平安戲，像中壢林森里福德祠8月14做平安戲（圖2），中壢龍興里福德祠8月初4做平安戲，中壢新街北門伯公祠8月初2做平安戲。做平安戲這日家家戶戶請人客，形成各各庄頭無共樣个日仔輪流「做鬧熱」，當多老人家「行親搭故」、「有上有下」，歸半隻月仔無轉屋下食夜。
圖2 中壢林森里福德祠迎三官大帝祭祀，演出平安戲
（己亥年8.14、2019.9.12攝）
就拿平鎮八大庄來看，日本時代登記个三官廟正安平鎮庄个鎮安宮、山仔頂庄个福林宮兩間定定，到這下「有爐無廟」个三官爐大部分就起起廟來吔！增加雙連坡庄个福明宮、南勢庄个南蒼宮、社仔庄个元和宮、北勢庄个三崇宮四間。過加宋屋庄義民廟、東勢庄建安宮也有奉祀三官大帝，做得講，平鎮庄庄有三官信仰。
安平鎮庄鎮安宮位在平鎮里南平路，怕係恁多間三官廟盡早起廟个，廟肚碑石有寫，到光緒19年，地方人士王、黃、胡、湯恁多姓人發起起廟，日本時代大正13（1924）年翻修，這下看着个係民國66年完成个，逐年8月11做平安戲。
山仔頂庄福林宮位在福林里東豐路、福林巷口，到明治36（1903）年，地方人士鄧欽鳳發起興建，在這下看着个係民國67年重修，71年落成个（圖3），廟地當闊，撥出空間分幼兒園、社區中心使用，逐年8月13做平安戲。
圖3 平鎮山子頂福林宮（2020.07.06攝）
雙連坡庄福明宮位在雙福路二段，非常有名，三百年前就有漳州姓謝人帶來三官爐奉祀，後來姓謝人徙到洽溪庄開發，饒平人劉奇珍三兄弟後代買姓謝人个土地，兩庄共同輪值三官爐。到日本時代，兩庄分香，福明宮跌筊分着香爐。到民國72年，由劉興典發起召集，興建一座高66尺个三官大帝神像，係全世界盡高个三官大帝神像（圖4），逐年8月14做平安戲。
圖4 平鎮雙連坡福明宮高66尺个三官大帝神像（2017.11.17攝）
南勢庄南蒼宮位在南勢里南華街，過去係10月15水官生个時節跌筊決定下兩年个爐主。一直到民國58、9年間，南勢村長謝清實正發起同林、徐姓人買地起廟，安到南蒼宮。原來八月十二做平安戲个，民國96年，重新起過新廟過後，提前兩日到8月初十做平安戲。
社仔庄元和宮位在圳南路18巷，民國73年，陳姓人士興建東社社區，起建一棟樓仔屋，二樓安置三官大帝神像服祀，就係今晡日元和宮个位所。以前社仔三官信仰係同中壢後寮庄共下輪值祭祀，到明治年間，人口增多，兩庄人士提議分爐，社仔分着三官爐，後寮庄望族朱傳明帶領眾信士到社仔迎三官大帝聖火，到後寮庄安奉，民國79年起廟安到興元宮。這下社仔元和宮8月14做平安戲，後寮興元宮8月16做平安戲。
北勢庄三崇宮位在振興西路，廟門口兩尊4.27公尺高个石獅係盡明顯个特徵。北勢庄原但係澗仔壢（中壢）十三大庄之一，範圍當闊。聽老一輩民眾講，本來有爐無廟時節，在這下个關爺東、西、南、北路交叉該搭仔搭棚祭拜、做平安戲。民國69年正由地方人士發起、捐地在這位所起廟，安到三崇宮，78年打醮，廟个規模當大（圖5）， 8月13做平安戲。
圖5 平鎮三崇宮門口兩尊4.27公尺高个石獅係盡明顯个特徵（2022.08.26攝）
東勢庄、宋屋庄雖然無三官大帝廟，也有共下服祀三官大帝。東勢建安宮逐年2月15主神開漳聖王三王公生，㓾豬公大鬧熱以外，逐年8月12也做平安戲。宋屋義民廟逐年7月20舉辦中壢十三聯庄「義民祭」㓾豬公大鬧熱以外，8月15也做平安戲、請人客，毋過在安到宋屋水尾大伯公个廣隆宮擴大改建落成過後，到民國80年，義民廟个三官大帝就迎到廣隆宮服祀，逐年8月15還係繼續做平安戲。
※本文的「着」，同教育部訂的「著」之意。
