包公擲墨盤──毋好貪墨
【圖／廖千慧；文／何石松】
發音人：何石松（海陸腔）
不論係耕田阿伯，抑係種菜伯姆；無斯老老嫩嫩介大人細子，全部都知歷史上有一個非常清廉公正，為老百姓主持公道介好官，該斯係鐵面無私介包公，大家喊佢包青天。
尤其係佢介品德像日月之光共樣，光明正大，有為有守，佢毋單淨係不應該得介毋會貪取，就係職務滿限離開時，感恩百姓送佢介紀念品墨盤，佢也毋會接受。佢認為，就算該小小介墨盤，也不應該收，該係鏖糟介行為，毋好貪，摎佢擲忒。所以講：包公擲墨盤──毋好貪墨。
歷史上介包公，名安到包拯，宋朝安徽人。佢除了廉潔以外，還非常有孝。佢29歲中進士，因為爺哀老咧，本來愛派去做知縣介，佢嗄辭官無去上任，在屋下孝順爺哀，等到爺哀過身以後，正去上任，前後經過10年，在當時係難得見介，實在有孝。
傳說介包公，執法非常公正，毋驚惡勢力，不論係皇親國戚介公主駙馬，抑係㧡擔賣菜介平民百姓，全部一律平等。有名「秦香蓮」介故事，正經表現了佢介公正廉明。「貍貓換太子」「智打龍袍」洗清了皇太后幾十年介冤屈，表現了佢介聰明智慧，專心辦案介能力，分人尊為「中國司法之神」，展現了傳統讀書人介風骨，聽講佢係「文曲星」轉世，能夠日判陽來夜判陰，死後識做過「五殿閻羅」，實在了不起。
就因為包公係一位非常受人歡迎介好官員，當能替百姓來想，雖然在端州斯做過三年定定，百姓就感受著當深咧。所以，等佢奉旨愛離開端州時，百姓想愛送端州最有名介墨盤，做等路分包公來紀念，又驚佢毋收，毋敢當面送分佢。特別用黃色綢緞布包裝好勢，先交分包興，並交代講，愛等包公離開端州以後，正好送分佢。
等到包公離開該日，來送佢介人多到像蟻行蜂飛共樣，萬人空巷，歸路人頭蠕蠕動，人潮像海水，一陣又一陣；看頭毋知尾，排到濛線。包公還係著等該雙舊鞋，向大家擛手，等佢行到城門時節，就摎佢介舊鞋，吊在城門項，提醒接任者，愛知好驚心，隨時愛廉潔奉公，造福百姓。
該日係一色青天，晴空萬里介好日仔。無胚著船仔行到西江，愛經過羚羊峽時節，突然之間，天烏地暗，雷公並拚；狂風捲地，大水噴天。船仔搖搖蕩蕩，孔孔竅竅，企都企毋核，看等像愛沈船介樣仔。包公探頭一看，唉呀！壞蹄咧！仰會恁樣形？心肝斯想：係毋係𠊎在端州三年，有對毋起百姓介事情？抑係有收著不應該收介等路啊？
當佢問著係包興收了百姓送佢介墨盤以後，心情斯像江中介狂風大浪共樣，翻滾不停，惹杈虐削，複雜難安。一方面感謝百姓介相惜，送這中國四大名墨之一介端州墨摎墨盤，係非常介名貴！難怪後來《紅樓夢》介賈政就做一隻令仔講：「身自端方，體自端正；雖不能言，有言必應。」斯係講端州介墨盤，係非常端正又係當好介，仰做得摎佢拿轉來？該正經係「鯽魚破背——鯉(理)毋當」啊！
一方面又試著，自家當見笑，當敗勢，對自家介部下管理毋嚴，正會儘採收人介等路，實在不應該，這就係𠊎介罪責，𠊎一定做毋得收，就係小小介墨盤，乜做毋得貪！
包公斯拿等該包等路，看也無看，行到船頭，向天公行隻禮以後，就摎佢擲落大江之中。講也奇怪，黏皮就雨停雲開，風恬浪靜，天就朗咧。清廉愛民又有智慧介包公，仰般愛擲墨盤呢？原來，係毋好貪墨啊！
※本文的「介」為大眾通用的「的」，同教育部訂的「个」之意。
