試鞋記
【原作、圖／王如斯；改寫／李秀鳳／國立中央大學客家語文碩士班】
發音人：李秀鳳（海陸腔）
前一駁仔，在面書頂高看著好朋友王如斯貼出一篇文章〈試鞋記〉，試著已生趣，想摎佢改寫變成客語版本个童話故事，講分小朋友聽。如斯鼓勵𠊎試看啊！
𠊎摎如斯熟事係在面書頂背，雖然兩儕無見過面，毋過當有話講。厥姐婆係桃園楊梅个客家人，頭擺輒常在屋下摎如斯个阿姆講客打嘴鼓，如斯聽得識一兜客話，可惜毋會講。
𠊎用客語改寫〈試鞋記〉還錄音，係希望做得陪伴如斯共下懷念佢天頂个姐婆摎阿姆，同時，也愛感謝佢在五年前，整理4篇姐婆、阿姆在世講過个鬼故事，提供分𠊎做田野調查个題材，豐富𠊎个碩論〈臺灣中北部客家鬼故事研究〉个內容。
續下來，就係𠊎講个〈試鞋記〉：
有一隻戴在莊下个蟾蜍，摎餔娘過等簡單个生活。有一日，佢接著小學同學𧊅仔个通知，講佢在城肚舉辦同學會，邀請蟾蜍共下來參加。
大家都知，在人類个社會裡肚，會去主辦同學會个人，大體係發扯扯、當好展，𧊅仔个世界也共樣。
同學會該日，蟾蜍著等厥餔娘特別摎佢做个布鞋，一躍一跳往城肚去。到了會場，看著一大群同學呱呱呱呱打嘴鼓，鬧熱煎煎。
𧊅仔四支腳著等兩雙金吱𥍉爧个皮鞋，跳上跌落展風神，當打眼。這兩雙皮鞋一看就知貴參參，大家議論紛紛：「𧊅仔个皮鞋還派頭哦！」逐個心肝肚雖然欣羨，毋過，無人敢妄想。
莊下蟾蜍毋識出空，毋知自家有幾重，話著小學時節摎𧊅仔坐兩隔壁，交情毋會差，就做得摎人借鞋來試著，體會著名貴鞋个感覺。大面神个蟾蜍，就摎𧊅仔提出要求：「你个皮鞋還靚喔！借𠊎著一下好無？」𧊅仔也毋會小氣（齧察），黏皮脫下一隻鞋分蟾蜍試著。
蟾蜍著著這隻皮鞋，試著軟濟濟、當舒適，佢還盡有興頭試跳兩下。蟾蜍个形投當古董，大家笑到激激滾。
𧊅仔挑挑講：「你愛逐隻腳試著看無？」
蟾蜍其實當想，毋過又試著敗勢，驚怕摎𧊅仔个皮鞋著壞仰結煞，佢賠毋起啊！所以佢謙卑又細義講：「毋使，𠊎著一隻鞋就當滿足咧！」
話正講煞，毋知仰般，蟾蜍一下踜蹭，跢到四腳惹天，跋毋起，好得無摎𧊅仔个皮鞋跢壞忒。毋過，嗄摎自家个布鞋矺壞。
恁見笑个事情，在𧊅仔个世界傳來傳去，人講「好事毋出門，壞事傳千里」，當遽就傳到蟾蜍厥餔娘个耳空肚。
跢到頭烏面暗个蟾蜍，一跛一跛跳轉自家个屋下。厥餔娘看啊著火屎燦天。好心細義摎佢攣好个布鞋毋好好著，硬硬愛去試著別人个皮鞋。毋係自家个鞋，著著當然毋合腳，毋係腳㬹小可痛，較嚴重兜，就係跢到烏青紫嘔。
這下毋止矺壞自家个鞋，還分餔娘刻臭頭，正經係雙頭剪，了多咧！餔娘試著你就係棄嫌𠊎做个鞋，日後你也毋使想愛著鞋。從今以後，佢也無分蟾蜍好面色看。
這隻古教精人：
毋係自家个東西，毋好妄想，
若係戇狗想食豬肝骨，
了忒个就毋單淨一隻鞋定定。
華語：試「鞋」記∕王如斯 原作
有一隻鄉下蟾蜍，跟妻子在鄉下過著簡單的生活。某日，蟾蜍的小學同學在城裡開同學會，主辦的是一隻「水雞」。眾所周知，在人類社會裡舉辦同學會的往往都是人生勝利組的人，在蛙界當然也是，所以這隻水雞也是屬於蛙界勝利組。
同學會當天，蟾蜍穿著妻子特地為牠縫製的布鞋，一跳一跳的往城裡去。到了會場，果然許多蛙蛙聚集，呱呱呱呱十分熱鬧！水雞穿著一雙閃亮亮的鞋四處跳躍，異常顯眼！那鞋一看就價值不斐，許多蛙蛙都議論紛紛，覺得水雞的鞋真體面！但大家都只是看看、暗自欣賞，不敢有非分之想。
鄉下蟾蜍就是鄉下蟾蜍，沒見過世面加上白目，不知道自己斤兩，以為小學時跟水雞坐隔壁，交情很好，就可以借人家的鞋來試穿一下，體驗穿名貴鞋的感覺。於是蟾蜍向水雞提出要求，說你那鞋真漂亮，可以借我穿、體驗一下嗎？水雞倒也大方，立刻脫下一隻鞋讓蟾蜍試穿，蟾蜍一穿，果然柔軟舒適，蟾蜍很興奮地還跳了兩下，那模樣一看就是鄉巴佬，把大夥都逗樂了。於是水雞故意說：「你要不要試試每隻腳都穿上？」
蟾蜍其實很想，但又覺得不好意思，怕把水雞的鞋穿壞了怎麼辦？牠可賠不起啊！於是很謙卑、靦腆的說：「我穿一隻就很滿足了！」
話才剛說完，不知道為什麼就摔了一大跤，而且還摔得不輕，還好沒把水雞的鞋摔壞，卻把自己原來的布鞋給壓壞了，這事兒一時在蛙界引為笑談，還傳到了蟾蜍的老婆的耳裡。
摔得灰頭土臉的蟾蜍，一跛一跛地跳回鄉下的家，老婆一看氣壞了！精心為牠縫製的布鞋牠不好好穿，偏對水雞的鞋存非分之想，不是自己的鞋穿著當然不適合，輕則腳疼，重則摔跤，這會兒不但壓壞了自己的鞋，還惹怒了妻子，妻子覺得你擺明了嫌棄我做的鞋，以後就讓你沒鞋穿好了。從此沒給過蟾蜍好臉色。
這事兒給大夥一個教訓，不是自己的東西別有非分之想，若是白目硬要，損失的可不只一隻鞋啊！
