踏入客語个世界
【文、圖／鍾榮富／南臺科技大學應用英語系講座教授】
發音人：鍾榮富（南四縣腔）
伊利諾大學个圖書館，聽人講係全美國大學圖書館底背排名當頭前，親像麼个書麼个論文都尋得著，這分𠊎盡大个方便。用英文書寫个客語研究，除了國內常見个字典先驅D. Maciver个前言同姊妹作以外，還係以日本學者橋本萬太朗M. Hashimoto寫个《客家方言》The Hakka Dialect (1973)最有見識、最有啟發性，也最完整，雖然內容大體講來還係相當傳統，還係用聲母韻母做基礎。該本書內引用个相關研究，後來都在伊大圖書館尋得著，這讓𠊎感覺當親切。
該日對鄭教授个辦公室行出來个時節，已經七點零，日頭漸漸落山，毋過伊大个校園還係人來人往，十分鬧熱。𠊎心中還係吊啊在半空中，無辦法靜下來思考，帶等息把个高興，可能有了愛研究个方向，實在講來終究擔心還係過大分。研究客話？這歸去講可能會分人謔死唷。千里迢迢，對台灣飛到國外來研究客話？
該當時，伊大校園內台灣留學生不少，當多台大、清華來个研究生，來這研究畜牧、農業科技方面个專業。同學之間，流行一个笑科，講有研究生分教授指定做「閹豬技術」个題目，同時指導教授鼓勵該同學先轉歸台灣，去同一個知名教授做研究，寫好論文正轉來拿學位。也有人講，校園肚有一個台灣教授，分人聘請過來專門研究包粟个交接、育種、種植，後來為伊利諾州帶來歸百種个包粟，贏著當地農民百姓个敬重，當然乜變做當有地位个教授。
無知在仰般个心情之下，𠊎行入圖書館，失魂落寞，六神無主。為了平息心中个激盪、不安、徬徨，𠊎先去武俠小說部門，放心看東方玉。看了歸暗晡，心情落定後，正去尋有關客話研究个文獻。𠊎先看橋本萬太朗个專書，了解客話个種類、分布、講法、同書肚提到个相關研究。第二日，再尋兜文獻，慢慢地拼出客話个形象。
接等，就去尋客家人相關个研究、書寫，畢竟語言學早先係人類學分出來个學門，語言同種族有密切个關係。先來了解客人，再來認識客話，這係𠊎个想法。講來當壞勢，𠊎身為客人，對客人同客話都毋清楚。一九八八年該下，有關客人、客話个書寫、研究、報告都十分少，偏偏羅相林有名个《客家研究導論》對語言个書寫又混雜又亂，係同《漢語方言概要》中个梅縣客做比較，對新入門个學生仔來講，更加失去了方向。
後來，𠊎發現還係愛對印地安語言个研究方法著手，正做得掌握田野調查个本事。就恁樣，𠊎讀了沙批爾(Sapir)同布倫菲爾得(Bloomfield)調查、分析、整理个報告、論文。有了基礎再回頭讀客話研究論文，正看出還有當多个問題值得深入探討，配上課堂內學著个自主音段理論，寫出𠊎个報告，正式邁入客話研究个初步入門。
