熱天熱熱 紅棗當甜
【圖／文／蔣佩儒】
熱天熱熱，苗栗公館紅棗節乜在七月二十三日揭開序幕啦！在七月中到八月尾都係這兜紅寶石个產季喔！而且苗栗公館係全臺灣唯一个紅棗種植產地，毋過佢單淨短短一個月个產期，現下就係最萋个季節，歡迎到這位買紅棗、食紅棗，還有當多當多有特色个紅棗產品做得買，做得共下踏上悠閒个腳步來一場田園旅行哦！
圖一：一粒粒鮮鮮帶等紅斑个紅棗，食起來脆又鮮，一口食下去“喀嚓”聲就會響起來，毋多知仔一粒接一粒，就會食當多喔！
舊年因為果實蠅摎風搓，影響著在地个紅棗產量，每儕農家人都無恁該，每一粒紅棗都係珍貴个，有了舊年个經驗，今年在農會𢯭手下，摎舊年比狀況有較好，毋過產量無當多哦！乜因為年年舉辦个紅棗比賽，提高了紅棗个品質，愛分紅棗一年比一年還較好，先生佢兜會對果子大細、均質程度、甜度、脆度等方面來評選，在今年更係由黃炎迴奪下特等獎，得著了紅棗王頭銜。
農會乜當用心，完隻活動從揆一樓祈福儀式到紅棗節「棗安苗栗 公館Sayhi」活動都當用心在宣傳，盼望分逐儕人客都感受著客庄風華！在這擺活動个參與下，你做得感受著臺灣耕田人對紅棗个用心，臺灣紅棗摎中國紅棗正經係無共樣个！對形狀、顏色、籽實大細、製程都會有差異，最簡單个辦法就係對大細粒來看，臺灣紅棗大部分都係直接分日頭晒，會迷你又扎實，色會較深；中國紅棗因為品種摎臺灣無共樣較大粒，而且製程大多都係用機器來晒分佢燥，故所會較蓬鬆，毋論係哪位來个紅棗，標示清楚，相信每一儕明白个消費者都做得選擇自家喜歡个紅棗！
圖二：鮮綠个果子在日頭下，變到無共樣，現出佢最靚个色彩，成為有內涵个紅棗乾，入菜後就會係最香个配角，分菜有好食个味緒。
