泅入字海
【文／徐佳妤／國小客語支援教師】
發音人：徐佳妤（南四縣腔）
昨晡日
刺耳个鬧鐘 響等 心躁躁
鬧熱个街路 行等 心孤栖
算無停个計算機 撳等 心拶拶
一本本个記數簿 寫等 心茫茫
腳 分世俗个價值 綯 緪緪
面 分名利个目神 看 現現
堪堪裁裁 唉唉唧唧
今晡日
對一出世 自家就像鴕鳥
濛沙煙肚 早撞走蓋多年
一 路
踜 踜 蹭 蹭 彎 彎 斡 斡
𠊎 係 麼人?
𠊎 仰 在這?
𠊎 愛 去哪?
毋想 懵懂過
毋想 刻耐做
毋想 過錯宕
天光日
另一個𠊎 腦肚 走 出
另一個聲 心窟 行 來
綻 開 跑馬 作 浪
殗殗个數目字 變 成
活跳个客語漢字
嘬水 啜湯 吮乳 唶果汁
煠肉 𤍒菜 炕肉 熇魚仔
挶屎 焗酒 跔手 跼雞仔
凝神 煞猛 記入心
旋旋風 影著 庰在
後背个𠊎在牽等𠊎
泅入 字海
