賊仔
【文、圖／彭欽清／國立政治大學退休教授】
發音人：彭欽清（四縣腔）
有人个所在就有賊仔，自古以來就係恁樣。
𠊎結婚到今，一直歇在臺北市，搬過六、七擺屋，分賊仔偷過兩擺。
第一擺係民國六十六年，𠊎留學正轉啊來無幾久，歇學校宿舍，堵著發大水，屋上水上到胸脯恁高，清淨過後，門掝起來關毋核，𠊎想屋下無麼个好偷，又還有外背个鐵門，將就無愛去關佢。
有一日𠊎下課轉來，鐵門打啊開，看著窗門無關，推啊開門，歸屋仔鬞交交仔，膨凳、被、書架仔這兜做下畀揙到淨淨。連冰箱肚大湖帶轉來个鹽生李仔就分賊仔拿出來食，怕嫌忒酸，淨咬一口定定就擲忒。
等吾餔娘轉來，點啊仔，盡有價值gie dad个係𠊎米國帶轉來个銀角仔十過兩十個銀，過一枝朋友送个Parker萬年筆。為著安全，還係煞煞打電話去派出所報案，巡查來看，在膨凳个矮桌仔項看著有鞋印，採無手指印，翕幾張仔相，問一下仔筆錄就走吔。
過吔成個月仔，分局打電話來講案仔破吔，有尋轉多少仔東西過錢，喊𠊎去認。去到分局，看著臺北市政府教育局長乜在該，佢係吾先生，佢講賊仔係幾下个輟學个國中生，在附近仔一哪仔偷。前一駁仔，利用空襲演習時間，去厥屋下偷，還睡當晝過食冰箱肚个西瓜。佢就投警察局長，正會恁遽破案。𠊎淨領轉萬年筆。
第二擺分賊仔偷係民國七、八十年仔，𠊎歇在信義路師大附中脣項，有一日臨晝仔接著樓下鄰舍个電話，講有賊仔去吾屋下偷，𠊎同吾餔娘拚等轉去。在計程車項，𠊎問佢屋下有囥麼个較價值个無，佢應講有吾姆送佢个手鈪過哀仔个手尾──同吾肚臍瓣放共下个禁指。
樓下个人同𠊎講，佢朝晨出去一下仔，賊仔䀯著佢無在就走入厥屋下偷，佢轉啊來，跈等報案，巡查來看，同佢講愛上去巡啊，看著吾門就知講壞了。
𠊎兩公婆一入屋，看著廳下無麼个爭差，入到吾間房看啊吔，簞笥个大拖箱仔開開，細拖箱仔倒覆轉來，對啊了，金器做盡無忒。
巡查講該站仔已多人家分賊仔偷，可能同對面農會起等大樓有關，佢做下仔筆錄，講有麼个進展會通知𠊎，過後就無消無息。
時代緊來緊進步，這下人當重視智慧財產權，毋單只偷人个錢財係賊仔，偷人个想法乜係賊仔。
學術界个人盡驚分媒體傳講偷用別人寫過个東西。若正經係分人認定講確實係“雅賊”，無死乜會半條命。
