藍鵲書房
【文、圖／薛常威／國立中央大學客家語文暨社會科學學系在職專班碩士】
發音人：薛常威（海陸腔）
新竹北埔係台三線上當恬靜个客庄，在這位新開了一家獨立書店，這間老屋本來係一間診所，書店外背係一欉老樟樹，風光當靚。店頭家陳萬成摎書店起名安到「藍鵲書房」係因為北埔這片看得到當多个藍鵲，算係北埔个特色，藍鵲長透係歸家人共下活動，感情當好。店主人兩公婆係新竹市人，本來在五指山頂畜一條流浪狗，一擺風搓來，狗嗄毋見忒，為著尋狗仔，兩公婆在五指山來到北埔，嗄愛著北埔這山城，斯歸屋人搬到這位。
「藍鵲書房」頭家陳萬成講，開書店其實毋會賺錢，佢斯想摎北埔个美好分享出去，分大家來北埔个時節，不係單淨看古老東西、食飯定，乜提供在地人熟識自家家鄉个所在，書店還長透舉辦讀書會、古蹟行讀、守護秀巒山等藝文活動，也係「外地人認識北埔个窗口」。店內雖然空間無大，還係做得感受著店主人選書个用心，全部係新竹在地文史、北埔相干个書。書店旁脣係拾樂坊咖啡廳，看書之外，還做得在這坐等啉一杯咖啡。希望「藍鵲書房」變成社區居民共下讀書、交流个平台。
書房營業時間係禮拜五到禮拜日，近期也辦理「好嘢趣培力課程」工作坊，學習植物採集記錄、田野調查、手機影像記錄摎寫作編輯。
書店行出來無幾遠就係「龍瑛宗文學館」，龍瑛宗係北埔出世个文學家，文學館係用以前北埔公學校个宿舍整理翻起過个，做得順續來這行行尞尞。
