楊梅埔心耆老影像發表
【文、圖／徐貴榮／國立中央大學客家語文暨社會科學學系兼任助理教授】
發音人：徐貴榮（四縣腔）
本（111）年3月17日埔心故事館開幕過後，跈等由「財團法人世聯倉運文教基金會」董事長黃仁安先生主持，發表基金會委託恆韻有限公司策劃製作个「心之所向，身之所往—楊梅埔心耆老訪談紀錄」影像(圖1)發表會。接受訪問个人總共13儕，大部分都七、八十歲以上，也有好多儕到場，鬧熱煎煎，見證這擺个盛會。
圖1 「心之所向，身之所往—楊梅埔心耆老訪談紀錄」影像(王婉榆女士提供)
民國100年，基金會識用五年个時間調查，出一本《過往今來話埔心》个書，全面報導埔心个地方文史，一下仔十年就過忒吔！黃董事長講：「當時訪談个人，當多就無在吔！好得有訪談，係無，到這下麼个就無吔！還有一息仔老行業，現代後生人大部分毋知个事情，希望留分後生人知得頭擺个故事，故所發心做這支影像紀錄。」影像裡肚訪問个大部分係本地人，也有別位來到埔心生根个。
第一個係民國29年次，一生人在埔心茶改場做事个徐發隆先生。37歲入場做技工，管理、灌溉、除草、監工項項來，照顧茶園大小事，一直做到退休。佢講識建議茶行改到尺八，符合機械化，係佢一生人盡得意个事情。
第二個係25年次，一生人就係篤實耕田个莊錦沐先生。佢用客講：「讀三年日本書，四年生換讀國語書，全讀毋識。六年畢業，當時無工場好做，就在屋下做田事做到老。」佢當得意拿等蒔田笐比蒔田，講佢細細仔就會犁田、踏割耙、打碌碡(圖2)、挲草个辛苦過去。
圖2 用來打爛泥矻个農具「碌碡」（拍攝時間：2017.06.18，地點：平鎮忠恕堂）
第三個係31年次，隆安碾米廠个頭家娘曾陳碧房女士。佢講民國56年嫁過來，埔心係佢放存後生同青春个所在。最懷念初下碼礱穀个時節，當多人拉等「利啊卡」來礱穀，礱一百斤正四箍。到經濟較好兜仔正賣米，該兩時有當多眷村个人會來糴米。本來埔心有十過家碾米，這下無咧！
第四、第五個係23年次，國校畢業就落瓦窯做瓦，做到36歲，做欸二十零年个黃金煙先生同厥倈仔黃木漢先生。佢用客講：「頭擺做瓦愛用瓦斗，拖割兩下兩垤瓦，一墩一墩仔放等。做毋得曬日頭，風燥過後，拿落窯肚燒，在窗仔看着燒到紅咚咚仔露出白色，正燒完成。」
第六、第七個係平鎮旅社經營人个長子馮國正先生同滿子馮錦榮先生。馮國正先生37年次，佢講當時旅社較陋筲，無套房，洗公共洗身間，來來去去个人客當多。記得工業堵堵興起个時節，益新紡織廠起忒年零，人客來歇有棧年零个。當時厥爸走外背公關，阿姆總包旅館个業務，還愛無閒屋下七個細人个三餐。滿子馮錦榮先生，42年次，係西裝師傅，佢講：「阿姆老咧！兄弟在外背食頭路，就換吾餔娘經營做下去。」
第八個係21年次，一生人做代書个林鍾祥先生。因為家庭變故，害佢放忒考司法官个願望。佢自謙講無牌，毋係律師，好得有讀兜仔書，會寫，人就喊佢寫，出庭就出庭。故所毋敢講自家係代書，名片就印「代書人」。佢講佢敢寫離婚書，仰般呢？係講男女雙方就絕情吔！分佢離緣又乜功德一件啊！
第九個係29年次，忠華中醫診所个負責人黃幸助先生。佢起先去開中藥行个姑丈屋下學中藥，後來成立黃復興中藥行，做中藥生理，民國62年考着中醫師。因緣際會，楊梅彭中醫師湊佢在中壢開第一間中醫醫院「中華中醫醫院」。佢講盡風光个時節，一日有千零儕來看病。後來改到「忠華中醫診所」，到這下還吂退休。
第十個係37年次，初中畢業就去外庄學輪胎手藝个黎萬欽先生。學好手藝辭忒頭家當好个待遇，堅持轉家鄉，開埔心第一間輪胎行。民國59年，「三和輪胎行」開張，佢用輪胎个發展，成就一生人个事業。強調「一個人定著愛有專業，有專業就會前途光明。」
第十一個係32年次，駛世聯倉運公司貨櫃車，做第一代貨櫃車司機頭路个賴正助先生。三十空歲仔，日日六點十分就愛出門，騎「奧多擺」在芎林來埔心上班。七點到公司，駛貨櫃走南北，到六十歲退休，毋識斷過。佢講：「見證埔心運輸業个興起，物流實力个發展。」
第十二個係30年次，擔任五守新村總幹事23年个黃瑞和女士。嫁分做兵个外省人，搬上搬下，落尾搬來五守新村，同人繡花、補衫褲，麼个都做。57年底老公退伍，細人仔去別人个屋下看電視，伏到紗窗外，轉來歸面仔同鼻公都膏到烏烏。想講莫恁冤枉，就用退伍金3萬零買一台歌林牌个電視分細人仔看。黃女士講：「恁多年來，見證眷村个發展同醹醹个人情味。」
盡尾一個係民國57年次，埔心茶業改良場退休，承辦這擺埔心耆老訪談个王婉榆女士。佢一生人無離開過埔心。佢講：「埔心這隻所在，位在農村同都市中間，有都市生活个利便性，還有兜仔保留農村个樣貌，希望做得透過這隻紀錄片，了解以前埔心識有个生活，識在這生活个人、識發生个事情，分大家知講識有過麼个？跈等前人做人做事个方法，為埔心盡一份心力。」
埔心發展當遽，到這下，礱穀、做瓦、旅社，甚至耕田這兜老行業，全消失咧！在頭擺生活困苦个時代，仰般改進生活？仰般去打拚？仰般求上進？黃董事長拍這隻紀錄片，看得着恁多埔心過去个人情、事物、老行業，當有價值。埔心本來係一個客家庄，片仔裡背正三兩個仔有講客定定，無保存着較多个客家話，試着已打爽。
※本文的「着」，同教育部訂的「著」之意。
