藍雷三姓親 三姓祭祖同
【圖／廖千慧；文／何石松】
發音人：何石松（海陸腔）
藍雷三姓親，三姓祭祖同，意思係講藍盤雷這三姓人家，頭擺係共屋下人，共隻祖公來介，過年過節，用共樣介例規，拜共樣介阿公婆，一直就當親。俗語講：五百年前係一家，老古人言也講：係講無分家，大家還係共飯甑食飯介，藍雷三姓，就係恁樣，雖然東遷西徙，還係同宗共祖，正經係：藍雷三姓共個祖，都係南京一路人。
除了藍雷三姓，來自一姓以外，還有儘多姓氏，也係共樣來自一姓。比論講：韓何藍麥紀等，原來全係韓姓一家，係因為逃難，過房介關係，正分出恁多姓；余佘涂徐等四姓，共樣來自余姓，有因為治水功勞當大，所以得著分封，摎為了避開秦王暴政，特別加立佘涂徐三姓為四姓，流傳後代，正毋會有滅族介危險，希望子孫一定毋好毋記得；還有翁方洪江龔汪等六姓介六桂傳芳，本姓翁，在亂世，驚怕子孫因為一儕分人陷害，受著牽連，所以分做六姓來做防範，正經係「生年不滿百，常懷千歲憂」，各姓介祖先，係仰般籌謀為佢介子孫設想啊！共樣，藍雷三姓人丁恁旺，全靠三公主介嚴守信用，摎厥爸介安名賜姓，就係所謂「山哈源頭係高辛，金鑾殿上賜姓名。」
聽講兩千零年前，黃帝介息嫲高辛氏（就係帝嚳──堯介阿爸），該當時，宮中有一個婦人家，醫生摎佢操耳屎介時節，嗄操出一尾蟲仔。佢試著當生趣，就用盤仔摎佢弇起來，無想著，幾日之後，蟲仔斯變做一條當靚介狗，當得人惜，就摎佢安做「盤瓠」。恁堵好，這下西片介犬戎派兵前來作亂，高辛也派軍隊去應戰，一直就打毋贏。
高辛氏愁勞博激，無結無煞，斯下一道聖旨講：「凡是能夠取得犬戎部下吳將軍頭那者，就賞佢黃金千斤，萬戶土地，還愛摎三公主嫁分佢。」盤瓠看著當暢，就接下聖旨，單人獨馬介向西片行，無幾久，分犬戎介兵仔捉著，因為生著靚，就摎佢送分吳將軍。吳將軍得著這條狗後，非常惜佢，日夜渡等，形影不離。一段時間以後，大家都知，這係吳將軍一等惜介狗，盤瓠摎大家當熟似，無人會提防佢。
有一暗晡，盤瓠利用吳將軍食酒食到酊昏飽醉，迷迷痴痴介時節，盡遽手介就咬下吳將軍介頭那，連夜像風馳電掣介速度，轉到京城。高辛氏驗著果然係吳將軍介人頭，一時之間嗄戆忒，正經係「老鼠跌落米缸肚，一重歡喜一重愁」，君臣相顧流目汁，看著盤瓠口難開。恁多人，你看𠊎，𠊎看你，無人敢講話。聰明介盤瓠，一下斯知麼介原因，突然用人聲講：「毋使愁，你兜摎𠊎張在葫蘆罐肚，七日以後，𠊎斯會變做緣投介細阿哥仔。」
到第六日介時節，皇后驚怕厥婿郎會翕死，就摎蓋仔打開來，因為時間吂到，頭那吂變為人形，鑽出來介係一隻狗頭，佢就係後來介狗頭王。盤瓠看著高辛無表示，話都無講，就像一陣風，飆向東片去。三公主看著毋像勢，就摎厥爸講：「阿爸，盤瓠既然銜首前來，講話愛守信用，尤其係君無戲言，正能成就大業，不可因為𠊎，失信於天下。」講忒，也像一陣風，向東走去咧。厥爸雖然帶兵去追，但是一直無辦法上山去。
幾年之後，公主背等細人仔轉外家。攬第一個分厥爸介時節，係用籃仔張等，所以斯姓藍；第二個係用盤仔張等，所以斯姓盤；攬第三個分厥爸介時節，好點點嗄響大雷公，該斯姓雷好咧，可見這三姓係一家親，目前這三姓合起來介人口，斯有幾下千萬人，係講無三公主介智慧，嚴守信用，摎盤瓠結婚，哪有今日介光景？
聽講目前這三姓介後代子孫，感念祖德，能夠飲水思源，過年過節介祭祖例規，全部共樣，面對盤瓠畫像，喊等盤瓠介名仔，用魚肉攪飯來誠心敬奉，表現出一種優良介姓氏文化，凝聚了民族介血脈，係文明進取介基礎，所以講：藍雷三姓親，三姓祭祖同。
※本文的「介」為大眾通用的「的」，同教育部訂的「个」之意。
