海角七號馬拉桑，琅嶠客家保力村
【文、圖／鍾孝昇／桃園市中壢區龍岡國小教師】
發音人：邱新春（四縣腔）
看過「海角七號」這齣電影个觀眾，該當都知著有一个賣原住民狗尾粟酒个後生人──「馬拉桑」。在電影底肚，佢偎凴煞猛做頭路个精神，毋單淨改變代表會主席對佢無麼个友善个樣相，乜贏著細阿妹仔个芳心。這隻有客家人勤儉精神个後生人，係對恆春半島个「保力村」來个。
「保力村」就在這車城鄉，係台灣盡南片个客家莊，也係墾丁國家公園入口个細莊頭。講着「保力村」，大家就會想著，該就係輒輒有軍事演習个所在。確實，保力村背後个山排，就係三軍聯合訓練个基地。平常時，這位係一片青溜溜个草坪，摎天頂个白雲相對望，靚到就像係一幅畫。毋過，撿採係堵著演習，砲彈聲黏時隆隆滾，滿哪仔都係大戰車捲起个濛沙煙。恁樣个情景，就摎村名「保力」共樣，有一段先民个血淚歷史……。
兩百五十零年前，本旦戴在屏東六堆个客家先民，日求三餐、夜求一宿在該辛苦開墾，因為耕種地毋罅，就下南去到恆春半島發展，保力村就係佢兜徙來這位个頭站，也係恆春半島上，唯一全村都係客家人个莊頭。因爭早期該位學老人較多，客家人較少，先民正到這位个時節，除忒愛摎原住民相爭土地，又過會分學老人欺負，大家團結起來，保持力頭來絡食，嗄變到當重要个事，故所就摎這位安到「保力」。但係武力个抵抗還較強，乜無法度贏過文化个侵入。在四圍都係學老人包圍下个環境，保力村民今這下都毋會講客家話，漸漸仔嗄變到講學老話个「學老客」。
毋過，祖先傳下來个客家精神，佢兜還係記得自家係客家人。這十過年，族群觀念提高，客家文化漸漸復振，這群「學老客」起勢了愛摎自家客家身分尋轉來个各種行動。佢兜成立「保力社區發展協會」，提出「琅嶠保力．客家風情」農村再生計畫，同時，乜修整「保安宮」、設立「保力客家文化館」，保留傳統客家生活个遺跡。這兜都係佢兜為著「保」存客家精神做个努「力」。「保力」這隻名，在兩百年後，又過一擺，重現在台灣盡南片个客家莊。
保力村當大个紅色牌樓，立在愛去莊頭个「褒忠路」
對屏鵝公路彎轉左手析駛落「褒忠路」，一隻當大个紅色牌樓，面頂「保力村」三隻字就在面頭前。「褒忠」這隻路名，既經說明了這就係客家莊。順等「褒忠路」，過一隻彎就看得著村民个信仰中心「保安宮」。從資料知著「保安宮」在光緒五年，先民正來到保力村該央時，就來起廟，主神「三山國王」還係轉唐山家鄉──揭陽縣請轉來个，這就知「保安宮」个歷史有幾久哩。
在保安宮頭前个兩棧樓壁項，紅紅个「琅𤩝客家」四隻大字當打眼。「琅𤩝」係恆春个舊名，用這四隻字，來喊恆春半島這隻个客家莊，係拗蠻仔適當个講法。除忒這扇壁，在地人還邀請恆春畫家廖宗賢先生，用牆面彩繪个方式，摎老頭擺个生活情形畫出來，傳達「硬頸精神、耕讀傳家」个客家特色。
保安宮面前紅紅个「琅𤩝客家」四隻大字當打眼
在保力村遶尞，雖然盡少聽到熟絡个客家鄉音，毋過面前个光景，又係親切熟面个客家元素。頭擺个保力村，雖然受着別个族群合着，也係婚姻个交流，語言同文化漸漸仔「學老化」，毋過𠊎想未來个保力村，定著做得摎自家原來个客家文化尋轉來。
「馬拉桑」這隻「早䟘三朝當一工」个後生人，對保力村出發，一儕人去到恆春大街，用毋驚分人笑个精神，推銷原住民狗尾粟酒，還過用當湛斗个音樂才華，企在表演舞台項。𠊎兜客家人就係有恁樣毋放棄个精神，正會得著眾人个肯定。𠊎想，為著生活煞猛打拚个馬拉桑，係恁樣个人，用心傳承客家文化个保力村民，定著乜係恁樣个人。
*照片皆攝於屏東縣車城鄉保力村
