有功打無勞(鑼)个蟲仔
【文／羅肇錦／國立中央大學客家語文暨社會科學學系榮譽教授】
發音人：羅肇錦（四縣腔）
崖有一個講山東土話个朋友，安到孔子。崖雖然同佢熟識已久欸，毋過，佢算來姓麼个名麼个崖乜搞毋清楚。就像崖眼時係客家學院个員外（員額之外），又係箕山个掌門（掌等門口）人，下二擺崖係麼人安到麼个名乜無人知，反正大家就係百代過客。
孔子一生人就好同人詏，普普仔同佢聽起來，厥話還算講道有道，講理有理，毋過佢也已會打肨喙，信口出，故所佢自家也吂識將這兜講道理打肨喙个東西拿來出版。無想著厥學生仔當有情義，同佢講欸多年个話榫拈拈起來，鬥鬥揫啊，留下一本書《論語 》。崖試着崖乜共樣，講過當多有个無个山語同戇話，毋知等崖離開空山了後，吾學生仔會拈吾空山不見人个話來出書無？
講恁多閒話，正帶倒轉來講，箕山最多最盛最無人緣个蟲仔，這兜蟲仔，得人惱到連孔子連員外也無想多講。比將孔子講評「寫詩个功能」嘎下，佢講詩做得「興觀群怨」, 做得「在家事父母」，做得「出外事君王」，還做得「多多認識鳥獸草木之名」。孔子打恁多肨喙，崖盡無結煞个係佢淨講「鳥獸草木」，挑挑閃開「蟲魚」無愛講。結果下後个人，全部照孔子講个，寫詩做得忠君孝父做得多多認識鳥獸草木，唯一漏忒个就係蟲魚之名。
該在空山無畜魚仔，孔子無講魚仔這崖無話講，但係空山滿哪就蟲仔，孔子講詩个功能，仰做得無講蟲仔。故所崖就去網路查古詩，看有人「寫蟲入詩」無？結果正經古人當少寫蟲入詩，尤其有名个詩句寫蟲仔个也當少。難怪孔子講君臣父子夫婦，講鳥獸草木就無講蟲仔，反想崖自家也共樣，寫箕山緣，從人情世故貓仔狗仔鳥仔樹仔草仔，一个一个寫下來，到今正想著滿山个蟲仔。
歇在箕山，滿山就係蟲仔，對山項生活个世界來講，蟲仔个功勞比天還較大，係無蟲仔，麼个就無辦法生存，像地泥愛蟲仔鑽蟲仔挖正會鬆，正做得種東西，樹仔愛白蟻來蛀正會歿，花粉愛靠蜂仔擛仔來傳，草仔愛蟲仔來食消腐化，鳥仔愛食蟲仔正會大，狗仔貓仔愛靠食蟲仔草仔畜大个各種食物來拖命。做得講無蟲仔就無飛禽走獸，無飛禽走獸就無空山世界，這係大自然个生物鏈个源頭。恁堵好蟲仔就係生物鏈肚項最低層个動物，體型細食量少，故所共同生活較無恁打眼，大家就較毋會去注意佢。故所自古以來人間動物，虧欠蟲仔盡多，蟲仔也毋識加講，就琢琢仔做厥有功打無勞（鑼）个事。現代社會留下來个蟲仔詞彙，差毋多就係貶低輕視个較多。像可憐蟲、跈屁蟲、糊塗蟲、豺蟲，無就像雕蟲小技、目睡蟲、淫蟲、摝屎蟲，攏總毋係講好話。可見蟲仔在動物界分人藐視个程度。
箕山肚也共樣，千百年來生活在這，恬恬過日仔，與世無爭个蟲仔怕有千百種，但係崖喊得出名仔个就怕存著幾十種定定。像臭鼻蟲、滴的（did diag）蛄、雞嫲（ma）蟲、逩屎蛄、土狗仔、泥蜂仔、草鞋貼（dab）、蜈蚣蟲、米蟲、牛穀仔、山牛角、㸐（nad）人狗、㸐（nad）角蟲、弓背蟲、火焰蟲、草唧仔、草馬仔、䘆（hien）公、蟻公、蚊仔、跳蚤、䗆蜱（gon bi）、牛蜱……。其他還當多喊毋出名仔，但佢就恬恬在若身邊過日仔，大家毋使相借問，也毋會相堵頭。除非你犯著佢，佢為著保護自家正敢咬你。一般來講，咬著人个蟲仔，差毋多就會分人打死挼死。無就用藥仔噴死，一日死傷千百隻，乜毋會有人會去祭拜佢去懷念佢。
蟲仔就係恁卑微下賤个生命，自古以來就毋識分人重視。毋過企在萬物逆旅生死一命來看，山東孔子恁分人重視無閒一生人，空山蟲仔恁無人緣乜係一生，有日出就有日落，有來就有去，愛使愁有功打無勞（鑼） ◦
※本文的「崖」同教育部訂的「𠊎」之意。
