中央大學電子報

選人少行个路

【文、圖／鍾榮富／南臺科技大學應用英語系講座教授】

　　 考過資格考，續等就愛尋主題，寫論文。𠊎選個課，主要集中啊在句法同音韻，這兩個係當時語言學个主要領域。在𠊎吂出國个時，台灣个語言學幾乎就等於句法，當時也無聽過音韻這个選項，毋過𠊎來到伊大以後，正感覺到音韻个趣妙。

　　 亻厓連選了八个音韻課程，也讀了盡多有關个論文同專書，八門音韻課都係Kenstowicz教授開个，佢當時就係國際知名个刊物Natural Languages & Linguistic Theory个主編，寫過幾下本盡多人用个教科書。上厥个課，毋只啟發當多，還學着愛仰般寫論文个訣竅，受用非淺，到今都還感念。除了音韻以外，𠊎乜同時選了八門句法課程，各種理論都下過功夫，對蒙塔古句法(Montague Grammar)特別有心得。本旦順等台灣語言學个地圖，理所當然愛行句法个路。選擇主題、領域實在係關係著未來一生个研究工作，故所一時無辦法決定。

　　 來到香檳个第二年暑假，𠊎無出去尞，決定同系上个鄭錦全教授做獨立研究。鄭教授係香檳个名人，當時還兼語言中心个主任，每日都無閒直掣。愛尋佢問問題、講話都盡難約。𠊎該下還吂上過厥个課，正知佢係台灣人定定。同佢做獨立研究以前，𠊎從來無想過愛做客家話研究。還記得該日臨暗，大部人都下班了，厥辦公室還係電火光明一片。佢問𠊎想愛做麼个研究，吂前致間，𠊎一下煞講無出，淨問佢有麼个主題做得研究。佢建議做客話研究。原來正知教授係新竹新豐人，周圍太體都係客家庄，佢本人會講息把客話，認為這係值得做个語言。

　　 出了厥个辦公室，𠊎直接就去圖書館，尋客話相關个研究。感謝伊利諾大學个圖書館，裡肚麼个書、論文都尋得着。無兩日个時間，𠊎已經尋着相關文獻个資料，開始閱讀，同時從頭去了解客話个特色。看了當多書以後，𠊎發現客話个語音，特別係韻母結構，十分鮮趣，用兩三個規則就做得解說所有个結構。原來語言本身就係有機个，帶等規律同原則，就做得解釋。但係這種看法過去還無人點出來，也無人做過類似个發現，內心相當歡喜。

　　 該年九月裡，堵好幾個台灣來的語言學教授，相約到Ohio State University做工作坊(後來就變做North American Conference on Chinese Linguistics)，伊大有兩個教授(兩位都係美國人)去參加，帶兩個同學(大陸來个周欣平同𠊎)。𠊎發表个論文就係這份獨立研究个報告，這份獨立研究報告宣讀以後，在場个教授分𠊎當多鼓勵，其中一儕將論文推薦分系刊(Studies of Linguistics)个主編教授，該份報告就恁仔出版了。

　　 這就係𠊎第一擺接觸客家話个緣由。做得用英文發表客話相關个研究完全係預外，更加無想着个係𠊎就恁仔行入客家話个研究。