尤加利樹个新娘
【文／富岡 邱鴻春／中央大學機械工程學系碩士】
發音人：邱鴻春（四縣腔 桃園楊梅）
尤加利樹份家啦
𠊎來 做新娘公
你來 做新娘
樹梗拗短來做針
樹葉來做布
𠊎來做條短褲頭
你來做領細短裙
短裙添兜花草就還靚
著等實在盡餳人
遽遽想愛來拜堂
樹子形像鑊嫲蓋
拈拈做下
轉屋拿來針摎線
手鈪䯋鍊
一串一串做出來
愛冗愛緪全做得
䯋鍊短个
做到心肝頭
長个 做到肚屎這
帽仔做好來拜堂
時間過仔有異遽
新娘已經做阿婆
享受三代天倫樂
渡孫來到動物園
看著無尾熊
慢趖慢趖得人惜
生活最湛斗
看佢食个尤加利葉
從細搞到大
這下細人全毋知
台灣一步一腳印
正有這下好光景
前人種樹後人涼
尤加利樹个新娘
四海五湖揚
