徙
【文／徐佳妤／國小客語支援教師】
發音人：徐佳妤（南四縣腔）
壬寅年，目珠擘啊開，對窗門看出去，做得看着闊野野个新北大都會公園。
歇了四十零年無電梯个販仔屋：該跡仔交通蓋利便，行幾步路就有菜市仔、雜貨店、百貨公司、銀行、郵局、醫院、賣場、區公所、圖書館、學校……你想得着个所在，販仔屋个附近全都有。
這係𠊎等上臺北同阿姨稅吔幾下年个屋仔後，吾爸買个第一間屋仔，佢，陪伴屋下人行過風風雨雨。屋仔个前陽臺像還鼻得着─阿姆最中意个蘭花清香，係舅姆分佢个，每年秋天定著會開花，這花，做得分阿姆登常想著外家。廳下像還看得着─有一年八月半，阿爸㓾柚仔，同柚仔帽戴在厥孫仔个頭那頂，吾姆看到緊㖸，五歲个倈仔毋管大人在搣，淨緊擘柚仔來食，這畫面，像，停下來吔，分𠊎翕起來了。間肚像還聽得着─阿姆著病毋爽快緊敨大氣、在眠床項喊𠊎同佢膏藥仔、換紗布……
販仔屋老吔，正經老吔，壁都起鹽霜吔：阿爸間肚个天棚，一落大雨就會滴水; 枋仔个地泥，堵着濕氣既經膨起來好久; 還有販仔屋無電梯。跈等阿爸年紀緊來緊老，看佢跋梯排緊來緊食力；若係買過重个東西，𠊎都愛喊倈仔𢯭手擐上去。等都市更新毋知愛等到哪央時？
舊年同阿爸參詳後，歸屋下人決定徙竇。先算自家个經濟能力，尋買吔起个屋仔，該量時，係有閒，就一哪仔去看屋，看着中意个屋仔，還請地理先生看屋場、尋銀行貸款、尋師傅裝潢，還愛裝冷氣、窗簾、熱水器、電火、買家具，整理拉拉雜雜愛搬過去个東西，四十零年个老屋，囤吔蓋多用毋著抑係無用个物品，無愛个就攉核，係講還好好自家用毋著个就送分人，做得資源回收个，就同屋下人煞猛扛下去賣錢。
搬屋該日，無想着嗄落大雨，只好取消，阿爸講：「好事多磨。」確實，對看屋起勢就差一息仔過定，買着毋適合个屋仔、堵着頭一個毋好溝通个裝潢師傅、又因為月給無高，堵開始嗄無銀行貸款分𠊎等，毋過總概都挨過去咧。
壬寅年，歸屋下毋使過跋梯排，阿姆留下來个菜籃車，總算用得著吔。
