乞食仔
【文、圖／彭欽清／國立政治大學退休教授】
發音人：彭欽清（四縣腔）
自古以來，無論哪位就有乞食仔。
亻厓還細該下，大湖一年會做幾下擺鬧熱，在關帝廟頭前个廟坪項做大戲。做鬧熱个頭兩日，乞食班會先到，毋係蹍街項个亭仔下，就係莊頭莊尾个伯公下，臨晝臨暗仔會一家一家仔去討食，大體人會添兜飯、舀兜菜分佢，無就分銀角仔。
做乞食个瘸手跛腳个單身哥仔較多，也會有帶等細人仔个婦人家，有个holo人毋會講客，淨會講：頭家，一息仔分啊仔好無？𠊎盡早學著个holo話就係這句。下擺仔也會有好手好腳个來討，較討毋著。聽吾姆講，有个好手好腳个已無結煞，有一擺堵好無銀角仔，同佢講無零星錢，佢嗄應講：𠊎做得找啊！
民國五、六十年，台灣个工商業緊來緊發達，看無麼著乞食仔。到吔七、八十年，台北个街路脣、天橋項、大个病院面前嗄有已多缺手缺腳个乞食仔，有个跪、有个仆、有个爬，日頭仰仔烈乜共樣，大體仔頸根會掛等一垤紙伯仔，毋係寫講爺哀擔著病無錢好醫，就係自家毋當樑無愛連累屋下人，看著膝頭就會出目汁，𠊎見堵着就會分多少仔錢。
下後新聞報講，這兜乞食仔係有一個集團控制个，逐日有專車載過來載過去，逐日看業績領錢。有个記者還講有个集團盡夭壽，同人會行个細人仔偷走，手腳斬斷來醫好就送去討食，講到有手有腳，大眾就無再過分這兜乞食仔錢，這種乞食頭路正慢慢仔末忒。
民國七、八十年仔，𠊎在臺北个金華街上班，歇附近仔，信義路項有一間麥當勞个亭仔下，逐朝晨十點邊仔到下晝四點零會有一個乞食哥凴在楯仔項，膝頭纏等有紅藥水个紗布，面前放一隻細塑膠盆仔，裡肚有一張一百箍个紙票過幾隻銀角仔，有一個朋友歇在附近仔，佢同𠊎講該乞食仔係上下班个，人分个錢佢偷偷仔拿起來放到袋仔肚，聽講收入贏過食月給。有一日𠊎下班，看着佢在巷仔肚行到一家人屋个圖牆下解忒紗布，騎上一輛odoby愛轉夜。
原在人講：乞食毋得三日過，三日一過，皇帝就毋做。 正經有影。
