倉鼠先生
【文、圖／葉金華／永和國小老師】
發音人：葉金華（四縣腔）
「倉鼠先生！細毛球同學今晡日仰無來學校上課？」晨光時間幾隻學生仔問𠊎，佢兜在屋下當關心班項畜个倉鼠細毛球。「佢請防疫假，敗勢喔！」這波疫情打亂了校園日常生活，確診人數緊來緊多，學校高不將暫停實體課程，改用網路遠距離教學。
班項一年級个小朋友第一擺參加吾線上課程，歸隻會議室裡肚鬧熱煎煎仔，小朋友翕在屋下，試着透過鏡頭看着同學已好搞，逐隻都搶等愛講話，毋記得摎麥克風關忒，還有小朋友砰砰滾緊用手指亂撳畫面緊搞電動，𠊎摎厥麥克風關忒，佢又挑事打開來，搣到教室喇叭朗朗滾像烏克蘭戰場。隔壁班个先生行過來關心到底發生麼个事情，𠊎遽遽摎同事會失禮、摎會議室關忒，上課盡無品質。
阿姆哀喔！舊年五一八停課个記憶猶在，將近兩隻月个「停課毋停學」網路課，像惡夢共樣分人一想着就頭那痛。學生仔放牛食草、減少一隻半月个實體課程，盡多應當學个東西都無學着，上課專心个程度也降低盡多。避暑過忒開學了後健康中心摎小朋友檢查視力，有當多小朋友都毋合格，吾班項27隻小朋友就有10個視力不良，聽護理師講有一個六年生个班級全班25儕，單淨伸一個小朋友無近視，還慘喔！
仰該煞？國小還過幼兒園个學生仔定著愛家長照顧，毋管工作有幾難㪐爪，家長總愛想辦法請假在屋下掌等細孲仔。𠊎試着線上課程比實體課程還較悿，長時間看電腦看著「目珠花花，瓠仔看做菜瓜」，眼茫鼻花遽會變著像倉鼠共樣目珠矇矇，自家安隻「倉鼠先生」个外號好了。這駁仔工作量加倍，暗晡夜還愛接家長个Line、處理班級事務，長透做到兵挷齒扯，𠊎有幾隻同事私底下講當想愛提早退休、轉去食自家算了，還無奈喔！「牛眼核摒屎朏—看各人个本等」，電腦資訊能力變做係一等重要个絡食條件。做先生儕較難了解學生仔實際个學習情況，上課時節毋係所有學生都肯坐下來摎鏡頭打開，先生跈教學進度、考試、改功課摎指導學生仔訂正作業就係當大个挑戰。
學生仔面對恁餳人个線上遊戲還過恁多奇奇怪怪个廣告資訊，當容易陷漯網路世界；有兜學生仔對網路平臺个操作毋係已熟絡，毋知愛仰般交作業；還有學生仔在網路項交着壞朋友，分人騙去做違法个事情……產生了當多亂象摎問題。雖然講科技資訊做得分人享受利便，佢乜帶來當多傷害。
今年四月底疫情爆發，一人若係遰着輒輒會傳分全家人；五月中旬𠊎摎吾班項个學生分衛生當局匡列愛居家隔離，連吾幾下隻同事都遰着新冠肺炎了。有一隻笑科講「若係無染着病就代表若人緣毋罅好、無麼个朋友」，哎喲喂呀！在這隻非常時節無朋友無相干，避免群聚較贏哪！
「樹頭係講生得在，毋驚樹尾做風搓」，做好防疫工作，輒常洗手、戴好嘴揞仔、維持正常作息、注重營養、多運動、保持好心情，盡人事聽天命，希望大家都做得平安康健。
