好農咖啡
【文、圖／薛常威／國立中央大學客家語文暨社會科學學系在職專班碩士】
發音人：薛常威（四縣腔）
桃園市平鎮農會用新个經營方式，結合在地農產，在平鎮南東路上農會旁唇開了一間「好農cafe」，餐飲个原料全部係在地農民種个，推廣咖啡搭配客家米食，想愛分還較多个後生人行入咖啡廳，認識在地農業摎客家文化，將客家米食融入在販售个餐點裡背。無算大个空間，舒適精緻，還有網美打卡牆，用創意个方式推廣特色農業。
起名安到好農café就係愛分民眾認識最好个在地農業，店內賣个各項花草茶、烏豆茶，全部係用在地茶農種个茶葉，還有用在地米，像龍德米庄生產个米來作米漢堡、米雞卵糕摎米鬆餅等，還有添加農會出產个秈米棒冰淇淋、特色簡餐，自食朝包辦到食晝摎下晝茶，分民眾有多元个餐飲選擇。
好農café一樓用玻璃屋个形式設計，純白个外牆打造一隻溫暖个細空間，二樓係烘焙教室，將來計畫開課程，店內還有田媽媽網美打卡牆、平鎮農特產品展售區，打造專屬平鎮區農業个文化咖啡廳。
平鎮區農會總幹事葉思瑋講，平常時會行入農會个大體係老一輩个農民，自從政府發放農遊券，當多後生人為著愛買農產品，正係一生人第一擺行入農會，正會想既然後生人好去咖啡廳食下晝茶，無就農會自己來開一間，2020年正式盛大開幕。平鎮農會有超過百年个歷史，希望農會做得推廣還較多个品牌特色，分無共歲數个民眾一行入咖啡廳就做得認識百年農會摎在地文化。
